Հերթական անգամ ադրբեջանցի է պայթել ականի վրա Արցախի` Ադրբեջանի վերահսկողության տակ անցած տարածներում։ Տեղեկությունը հաղորդում է Sputnik Ադրբեջանը։
Ասվում է, որ 37-ամյա սակրավոր Էլմադդին Թոֆիգ օղլուն Միրզաևը վիրավորվել է հակատանկային ականի պայթյունի արդյունքում ՝ դրա վնասազերծման ժամանակ: Նրան տեղափոխել են Աղդամի կենտրոնական հիվանդանոց, որտեղ վիրահատել են, վիճակը գնահատել կայուն ծանր: Միրզաևի ոտքը անդամահատել են։ Նա բազմաթիվ բեկորային վնասվածքներ ունի:
Հիշեցնենք` հունվարի 21–ին զինծառայող Ռաշադ Ջավադովն էր Ֆիզուլու շրջանում պայթել ականի վրա։
Ավելի վաղ ճանապարհաշինության աշխատանքների ժամանակ ականի վրա պայթել էր 41-ամյա Ալիյար Օջագվերդիևը, Կուբաթլուում ականի պայթյունի արդյունքում մահացել էր մայոր Մուխթարով Սարխան Իլգար օղլուն։ Հունվարի 1-ին էլ Ֆիզուլու շրջանում մի ադրբեջանցի էր պայթել ականի վրա, նրա 2 ոտքերն անդամահատել են։ 2020–ի դեկտեմբերի 14-ին Աղդամում ականի պայթյունից մեկ ադրբեջանցի էր մահացել, ևս երկուսը վիրավորվել էին։
