Արցախի Ազգային ժողովի նախկին պատգամավոր Հայկ Խանումյանը Ֆեյսբուքում մեկնաբանություն էր գրել այն մասին, որ դեկտեմբերի 13-ին ՌԴ ՊՆ կողմից Արցախում տեղակայված խաղաղապահների պատասխանատվության գոտում Խծաբերդ-Հին Թաղեր հատվածը ներառող քարտեզի հրապարակումից հետո թշնամին ավելի է առաջ եկել, այդ թվում՝ Շուշիի շրջանում՝ օգտագործելով ականանետ և հետախուզական ԱԹՍ։
Այս թեմայով լրացուցիչ տեղեկությունների համար Ռազմինֆոն կապ է հաստատել Հայկ Խանումյանի հետ, ով հայտնել է, որ ունենք նոր վիրավորներ, ինչպես նաև չի հաջողվում կապ հաստատել 9 հոգու հետ, որոնց թվում ևս վիրավոր կա։
Կայքի հետ զրույցում Խանումյանը նշել է, որ Արցախում ռուսական խաղաղապահ ուժերի հրամանատար Ռուստամ Մուրադովն այսօր պետք է ճշտի այդ 9 հոգու կարգավիճակը. արդյո՞ք գերի են, թե ոչ։
Նշենք, որ Հայկ Խանումյանը պատերազմի ժամանակ մասնակցել է Հադրութի շրջանի Դիզափայտի դիրքերի պաշտպանությանը։
Հիշեցնենք, որ դեկտեմբերի 11-ին Արցախի Հադրութի շրջանի Հին Թաղեր և Խծաբերդ բնակավայրերի ուղղությամբ Ադրբեջանի նախաձեռնած սադրիչ գործողությունները հետագայում շարունակվել են նաև Շուշիի Մեծ Շեն և Հին Շեն բնակավայրերի ուղղությամբ:
