ՀՀ կառավարության տարեվերջյան նիստում ՀՀ վարչապետ Նիկոլ Փաշինյանն անդրադարձավ Ամանորի միջոցառումների համար հատկացված 270 մլն դրամին։
«Այս որոշման հիմքում երկու հայեցակարգային որոշում է դրված. Առաջինը, մենք պայմանավորվել ենք, որ մեր քաղաքականությունը պետք է միտված լինի հնարավորություններ ստեղծելուն եւ ընդլայնելուն: Այս առումով մենք պետական միջոցների ծախսման առավել երկար հետագիծ պետք է կարողանանք որդեգրել, որպեսզի ծախսված միջոցներն ավելի մեծ ավելացված արժեք բերեն:
Երկրորդ, մենք խնդիր ենք դնում, որ Ամանորը նշելու մթնոլորտը որոշակի փոփոխություն կրի: Վերջին տարիներին տրենդ էր դառնում, որ մարդիկ նախընտրում էին Ամանորը նշել ՀՀ-ից դուրս, որովհետեւ Ամանորը նշելու այն պայմանները, որ կան Հայաստանում, մարդկանց համար ստեղծում են բազմաթիվ անհարմարություններ:
Մենք ուզում ենք Ամանորը դարձնել իրոք հանրային տոն, որտեղ հանրությունը միասին նշելու հարթակ ունի: Նաեւ Ամանորը ավելի շատ տրամադրության տոն սարքել, քան ուտելիքի, որը հետո վերածվում է որոշակի դեպրեսիվ վիճակների: Մենք աշխատել ենք, որ տոնի մշակութային մասը լինի բավական աշխույժ»,-ասաց վարչապետը:
Փաշինյանը նշեց, որ Ամանորից առաջ ընտանիքները կանգնում են երկընտրանքի առջեւ, թե ինչի վրա ծախսել գումարը. «Այս երշիկից գնել, թե չգնել, կամ որքան գնել: Ես առաջարկում եմ Ամանորի առիթով հարազատներին, ընկերներին, բարեկամներին ներկայացումների տոմս նվիրել» ։
Նա ասաց, որ մշակութային հաստատությունները հենց տոմսերի միջոցով պետք է ապահովեն իրենց եկամուտները։ Փաշինյանի խոսքով՝ դեռ չեն ասում, թե պետք է մշակութային օջախները պետական հատկացում չստանան, բայց դրանք պետք է նաեւ ապահովեն իրենց սեփական եկամուտները։
ՀՀ ԿԳՄՍ նախարար Արայիկ Հարությունյանն ասաց, որ իր բոլոր գործընկերներին Ամանորյա ներկայացման տոմսեր է նվիրել։ Փաշինյանը կատակեց, թե «Ձեր անձնական միջոցների՞ց ես գնել տոմսերը։ Դե Ձեր բախտը բերեց էլի, որ նախարարությունների թիվը կրճատեցինք»
