Թաիլանդական բռնցքամարտի չեմպիոն Աշոտ Բոլյանի սպանության վայրում գտնվող բնակելի շենքի բնակիչները պնդում են, որ կրակոցի ձայներ չեն լսել, գրում է «Կոմսամոլսկայա պրավդան»: Սա հաստատում է հետաքննության այն վարկածը, որ հանցագործը խլացուցիչի միջոցով է ատրճանակը գործի դրել: Սպանված տղամարդու դին գրեթե մեկ ժամ մայթին է ընկած եղել, այն նկատել է հարևանուհին և հաղորդում տվել ոստիկանությանը:
Բռնցքամարտիկին պատկանող Infiniti մակնիշի ավտոմեքենան, որի մոտ տեղի է ունեցել սպանությունը, կնքված է և պատված՝ սպիտակ վարդերով:
«Դա հաստատ պատվերով սպանություն է: Դատելով հանցագործության պատկերից՝ սպանողը պրոֆեսիոնալ մարդասպան է: Նա մեկ ճշգրիտ կրակոց է արձակել: Նման քրեական գործերի քննությունը միշտ էլ դժվար է»,- մեկնաբանել է փաստաբան Կարեն Ներսիսյանը՝ շարունակելով, որ անգամ ինքը վարկածներ չունի: Ըստ նրա՝ Աշոտ Բոլյանը հարգված մարզիկ էր, ով իր կյանքի միջոցով հասել է ամեն ինչի: «Նա մեծացել է աղքատ ընտանիքում և հայազգի շրջապատում: Նրան հարգում էին Մոսկվայի հայկական սփյուռքում: Հիմա բոլորը ցնցված են կատարվածից»:
Փաստաբանը նաև կարծում է, որ իրավապահ մարմինների աշխատակիցները պետք է կասկածյալներ փնտրեն նրանց թվում, ում ձեռնտու էր նախկին մարզիկին վերացնելը։ Նա սպանությունն անվանել է 1990-ականների վերադարձ։
Տեղեկացնենք նաև, որ Մոսկվայի գծով ՌԴ ՔԿ գլխավոր քննչական վարչությունում քրեական գործ է հարուցվել ՌԴ ՔԿ 105-րդ հոդվածի 1–ին մասի (սպանություն) և 222–րդ հոդվածի 1 մասի (զենքի ապօրինի շրջանառություն) հատկանիշներով։ Համալիր քննչական և օպերատիվ հետախուզական գործողություններ են իրականացվում հանցագործին հայտնաբերելու ուղղությամբ։ Հետաքննությունը շարունակվում է։
ArmLife.am
