Երեկ՝ սեպտեմբերի 28-ին, արտակարգ դեպք է տեղի ունեցել Արարատի մարզում: Ժամը 12:00-ի սահմաններում ոստիկանության Մասիսի բաժին անհայտ քաղաքացուց ահազանգ է ստացվել, որ Մասիս քաղաքի Նոր Թաղամասի 35 շենքի 14 բնակարանում խառնաշփոթ վիճակ է և խնդրել է, որպեսզի նշված հասցե շտապ ոստիկան մոտենա:
Shamshyan.co-ի փոխանցմամբ՝ նշված վայր է մեկնել ոստիկանության Մասիսի բաժնի օպերատիվ խումբը՝ համայնքային ոստիկանության բաժանմունքի պետի գլխավորությամբ: Ոստիկանները պարզել են, որ նշված տան բնակիչ, 31-ամյա Վրեժ Գ.-ն, գտնվելով ոչ ադեկվատ վիճակում, բնակարանից տարօրինակ ձայներ է արձակել, ինչի կապացությամբ ժամանել են Արտակարգ իրավիճակների նախարարության փրակարար ծառայության Մասիսի հրշեջ-փրկարարական ջոկատը՝ 1 մարտական հաշվարկով:
Փրկարարները բացելով բնակարանի դուռը՝ այնտեղ հայտնաբերել են Վրեժ Գ.-ին, ում աջ ձեռքին եղել է սղոց, իսկ ձախ ձեռքին դանակ, որտեղ էլ նա սպառնացել է, որ ոստիկանների պարանոցը կտրելու է: Ոստիկանների և փրկարարների ձեռնարկված միջոցառումների և բացատրական աշխատանքների շնորհիվ, որը տևել է մոտ 3 ժամ, Վրեժ Գ.-ն, սղոցը թողնելով տանը, դանակով դուրս է եկել տնից:
Ոստիկաններն ու փրկարարները հետապնդելով նրան, հարևան շենքի դիմաց վնասազերծել են, ձեռքից խլելով դանակը:
Վրեժ Գ.- ն դեպքի վայր ժամանած շտապօգնության ավտոմեքենայով տեղափոխվել է Նուբարաշենի հոգեկան առողջության պահպանման ազգային կենտրոն:
