Այսօր, մարտի 14-ին, աշխարհում նշվում է ամենայուրօրինակ տոներից մեկը՝ «Պի» թվի միջազգային օրը։
Առաջին անգամ տոնը նշվել է 1988թ․, Սան Ֆրանցիսկոյի «Էկսպլորատորիում» գիտահանրամատչելի թանգարանում, իսկ դրանից մեկ տարի առաջ այս ոչ պաշտոնական տոնը հորինել էր ֆիզիկոս Լարի Շոուն, որը նկատել էր, որ ամսաթվի ամերիկյան համակարգում (ամիս/ամսաթիվ) մարտի 14-ը՝ 3/14, համապատասխանում է թվի առաջին թվանշաններին՝ π=3,14․․․
Այս ոչ սովորական թվի հետ մենք ծանոթանում ենք դեռեւս ցածր դասարաններում, երբ սկսում ենք ուսումնասիրել շրջանը, շրջանագիծը։ π-ն մաթեմատիկական կայուն մեծություն է, որն արտահայտում է շրջագծի երկարության հարաբերությունը տրամագծի երկարությանը։ Թվային արտահայտությամբ «պի»-ն սկսվում է 3,141592․․․-ով եւ շարունակվում մաթեմատիկական անվերջությամբ։
