«ԲՀԿ դիրքորոշումն այս հարցի մասին այն է, որ որևէ հարց՝ Արցախի ճանակատագրի հետ կապված, չի կարող լուծվել առանց Արցախի ու Արցախի ժողովրդի մասնակցության»,- այսօր ԱԺ ճեպազրույցների ժամանակ ասաց ԲՀԿ խմբակցության պատգամավոր Իվետա Տոնոյանը՝ անդրադառնալով Մինսկի խմբի համանախագահների հայտարարությանը: «Մնացածն արդեն քաղաքական գործընթացներ են, որի հետ կապված ԲՀԿ-ն բազմիցս հնչեցրել է գնահատականներ և առաջիկայում էլ կհնչեցնի»,- հավելեց նա:
Ըստ Տոնոյանի՝ հաշվի առնելով Ադրբեջանի ռազմաշունչ, կոնկրետ ուժի կիրառման դիրքերից հանդես գալու հայտարարությունները՝ ԵԱՀԿ Մինսկի խմբի համանախագահների տարածած հայտարարության մեջ նշված զիջումներն անընդունելի են:
«Այստեղ երկու կարծիք չի կարող լինել, ԼՂ հիմնախնդրի կարգավորումը դա Արցախի միջազգային ճանաչումն է: ԵԱՀԿ Մինսկի խմբի համանախագահների հայտարարության մեջ շատ մտահոգիչ կետեր կան, մասնավորապես, Վիեննայի և Սանկտ Պետերբուրգի պայմանավորվածությունները երկրորդ պլան են մղվում: Մեր կուսակցությունը բազմիցս իր դիրքորոշումը հնչեցրել է, և այս դեպքում միայն այն հանգամանքը, որ Ադրբեջանի կողմից շատ մեծ ոգևորությամբ է ընդունվել այս հայտարարությունը, արդեն իսկ շատ բանի մասին է խոսում: Մեր ԱԳՆ կողմից ևս մեկ անգամ այս հայտարարությանն անդրադառնալու խնդիր կա, քանի որ պոստ ֆակտում նախօրեին Ադրբեջանի կողմից հայտարարությունը մեծ ոգևորությամբ ընդունելը տարակուսանքի տեղիք է տալիս»,- ասաց նա:
