Հայաստանի վարչապետ Նիկոլ Փաշինյանը կարևոր է համարում, որ դատական վեճերի լուծման այլ մեխանիզմներ գործի դրվեն, քանի որ դատական համակարգի ներկայիս գործունեությունը վնասում է նաև տնտեսությանը։
«Դատաիրավական բարեփոխումների համակարգում չափազանց մեծ նշանակություն ենք տալիս դատական վեճերի լուծման այլընտրանքային մեխանիզմներին, եղանակներին, որովհետև դատական համակարգի այսօրվա գործունեությունը շատ մեծ պրոբլեմներ է ստեղծում տնտեսության համար։ Օրինակ՝ այսօր այս պահին 300 մլրդ դրամ կա Հայաստանի Հանրապետությունում, որ դատական պրոցեսի մեջ գտնվելու պատճառով ոչ մեկինը չէ։ Այսինքն՝ դա ինչ-որ մի տեղ դրած է, և տարբեր մարդիկ վիճում են, թե այդ գումարն ումն է և քանի դեռ այդ վեճը լուծված չէ, այդ գումարը չի կարող ներդրվել տնտեսության մեջ», — հայտարարեց վարչապետը՝ պատասխանելով պատգամավորներից մեկի հարցին, թե ինչպես է պատկերացնում Փաշինյանը արբիտրաժային դատարանի զարգացման հեռանկարը։
