Իմ քայլը խմբակցության պատգամավոր Հայկ Կոնջորյանը խորհրդարանում լրագրողների հետ զրույցում անդրադարձավ իր ելույթում հնչեցրած «ավտորիտար բնույթի Իրան» ձևակերպմանը: Նա ասաց, որ բանավոր խոսքում վրիպել է, իր սխալներից դսեր կքաղի:
«Նախ ուզում եմ միանգամից ասել, որ իմ բառերն արտահայտում են իմ կարծիքը, դա իմ մասնավոր ձևակերպումն է, բացարձակապես խմբակցության կարծիքը չէր, որի մասին ԱԺ նախագահ Արարատ Միրզոյանն իմ ելույթից հետո անմիջապես նշեց: Ես նշել եմ՝ ոչ թե ավտորիտար Իրան, այլ ավտորիտար բնույթի՝ որոշակիորեն հավանաբար նկատի ունենալով այն հանգամանքը, որ Իրանի քաղաքական համակարգը մի փոքր յուրահատուկ է: Սակայն հաշվի առնելով նաև հանրության արձագանքը՝ ես միանաշանակ ընդունում եմ, որ գուցե պետք էր այլ կերպ ձևակերպում տալ, գուցե մի փոքր ես վրիպեցի, ինչպես ցանկացած քաղաքական գործիչ կարող է երբեմն բանավոր խոսքի ժամանակ ունենալ նման ձևակերպումներ: Ես ցանկանում եմ ասել, որ ամենևին չեմ նսեմացնում բարեկամ Իրանի ժողովրդի և պետության՝ Հայաստանի հետ ունեցած բարիդրացիական ու ջերմ հարաբերությունները: Գուցե բանավոր խոսքի ընթացքում եղավ նման վրիպակ, որն այլևս չի կրկնվի»,- ասաց Կոնջորյանը:
Նա նշեց, որ իր հայտարարությունը կազդեր հայ-իրանական հարաբերությունների վրա, եթե դա լիներ Իմ քայլը խմբակցության պաշտոնական կարծիքը, եթե ինքը այս պարզաբանումը չտար ու չասեր, որ վրիպակ էր: «Դրա համար վստահ եմ, որ մեր Իրանի գործընկերները, ովքեր ունեն տարակարծություններ, ևս կտեսնեն իմ մեկնաբանությունը»,- հավելեց նա:
