2019 թ-ի հունվարի 1-ից ուժի մեջ մտան ՀՀ կառավարության որոշ որոշումներ, որոնց պատճառով ռեստորանատերերի համար մեծանում է հարկային բեռը, ինչպես նաև ավտոներկրողների համար է փոփոխվում մաքսազերծումը:
Այսպես, ռեստորանատերերի համար սահմանված հարկային բեռը,ըստ նույն ռեստորանատերերի, բավական բարձրացել է, որի արդյունքում թանկանալու են նաև ռեստորանների ծառայությունները: Սակայն նույն ռեստորանատերերը համոզված չեն, որ մատուցված ծառայությունները թանկացնելուց հետո իրենց հաճախորդները կշարունակեն օգտվել ռեստորանների ծառայություններից: Այդ ամենը կարող է հանգեցնել մեծ քանակությամբ ռեստորանների փակմանը, որն իր հերթին կբերի աշխատատեղերի կրճատմանը,ինչպես նաև գյուղմթերքների վաճառքի նվազմանը:
Հունվարի 1-ից նաև փոխվել է արտասահմանից ՀՀ ավտոմեքենաների ներկրման մաքսազերծումը և այն վերադարձել է նախկին թալանչիական համակարգին, երբ մարդը մեքենան արտասահմանում, օրինակի համար գնում էր 3000 դոլարով, իսկ ՊԵԿ-ն այն գնահատում է, օրինակի համար 5500 դոլար և դրանից դուրս գալով մեքենա ներկրող անձը պետք է այդ մտացածին 5500 դոլարից պետությանը վճարի 32 տոկոս: Դա տարրական թալան է:
Մինչ այս կարգի ներդրումը ավտոներկրողը մաքսազերծում էր գնված մեքենան հաշիվ-ֆակտուրայի հիման վրա՝ինվոյսով:
Հավելեմ, որ մինչ այս էլ Հայաստանը տարածաշրջանի ամենաթանկարժեք երկիրն է ավտոներկրողների համար. Այսպիսի խայտառակ համակարգ գույություն չունի ո՛չ Ադրբեջանում, ո՛չ էլ հատկապես Վրաստանում, որի կառավարությունն ամեն ինչ անում է, որպեսզի Վրաստանը դառնա մեքենաներ ներկրողների տարածաշրջանի “դրախտավայր”՝ամենացածր հարկերը սահմանելով ավտոներկրողների համար: Չեմ զարմանա,եթե շուտով ականատես լինենք վրացական պետհամարանիշներով մեքենաների կտրուկ ավելացմանը հայաստանյան ճանապարհներին:
Այս որոշման արդյունքում էլ կթանկանան Հայաստանում վաճառվող մեքենաների գները,ինչպես նաև կրկին կաճի էժան և հնամաշ մեքենաների ներկրման քանակը:
Հիմա երևի բոլորն էլ հասկանում են, թե ինչու են ՀՀ քաղաքացիների մեծ մասը իրենց ամառային և ձմեռային՝Ամանորյա արձակուրդներն անցկացնում Վրաստանում, ինչպես նաև մինչ այս վերջին անտրամաբանական որոշումն էլ մեքենա գնելու համար գնում Վրաստան: Իսկ հիմա այդ մարդկանց թիվը կտրուկ կավելանա:
Հ.Գ.Մոտ օրերս ՀՀ վարչապետի և Հայաստանի ռեստորանների միության անդամների միջև տեղի կունենա հանդիպում.Սպասենք արդյունքներին…
Գագիկ Համբարյան
