Հետհեղափոխական Հայաստանում նոր ընթացակարգով ոչ մի դատապարտյալի ներում չի շնորհվել։
Վերջիններիս հարազատների հեռախոսազանգերին՝ Արդարադատության նախարարությունից պատասխանում են, որ գործընթացը սկսված է։ Դեռեւս ամռանը ներման խնդրագիր է ներկայացրել «Արմավիր» ՔԿՀ-ի ցմահ դատապարտյալ Ստեփան Գրիգորյանը։ Նա մեզ հետ հեռախոսազրույցում կես կատակ, կես լուրջ նշեց, որ «համբերության իմունիտետն արդեն սպառվում է»։
Հիշեցնենք, որ արդեն 24 տարի է Ստեփան Գրիգորյանը անազատության մեջ է ։ Նրա խոսքերով՝ վարչապետի պաշտոնակատար Նիկոլ Փաշինյանը եթե ուզենա, ապա ինքն ու ներման խնդրագրերով դիմած այլ դատապարտյալներ 2019 թվականը կդիմավորեն հարազատների հետ։ «Նիկոլ Փաշինյանը գիտի ինչ է ազատության սպասողի հոգեվիճակը, նա եւս ապրել է դա։ Ես գրեթե համոզված եմ, որ մինչեւ տարեվերջ՝ Փաշինյանը ներման որոշումները կուղարկի ՀՀ նախագահին»,-եզրափակեց Ստեփան Գրիգորյանը։
Հիշեցնենք՝ ըստ Գրիգորյանի քրգործի նա ոչ մեկին կյանքից չի զրկել, պարզապես սպանության ականատես է եղել։
