Փարիզում անհայտ անձը դանակով հարձակվել է անցորդների վրա, ինչի հետևանքով 7 մարդ է տուժել, հաղորդում է Le Parisien-ը:
Միջադեպը տեղի է ունեցել սեպտեմբերի 9-ին՝ տեղական ժամանակով ժամը 22:45-ի սահմաններում, Փարիզի 19-րդ շրջանում: Հաղորդվում է, որ հարձակվողը նախ վիրավորել է կինոթատրոնի մոտ եղած մարդկանցից մի քանիսին, որից հետո ականատես տղամարդիկ փորձել են կանգնեցնել նրան՝ նետելով պետանկ խաղի համար նախատեսված մետաղյա գնդակը:
Սակայն հանցագործին հաջողվել է պաշտպանվել գնդակից, որից հետո նա հարձակվել է երկու բրիտանացի զբոասշրջիկի վրա: Նշվում է, որ զբոսաշրջիկներից մեկը վնասվածք է ստացել որովայնի հատվածում, իսկ մյուսը՝ գլխի: Ընդհանուր առմամբ՝ միջադեպի հետևանքով տուժել է 7 մարդ:
Տուժածներից հինգը գտնվում են վերակենդանացման բաժանմունքում, ևս երկուսի վիճակը գնահատվում է միջին ծանրության:
