ՀՀ գլխավոր դատախազի նախկին տեղակալ Արմեն Դանիելյանը Ֆեյսբուքի իր էջում գրել է.
Պարադոքս է, բայց նույնիսկ ձախողված քաղաքական գործիչները պայքարում են մինչեւ վերջ, եթե անգամ գիտեն` իրենց մահ է սպառնում: Սակայն, պատմությունը վկայում է, որ առավել արժանապատիվները կյանքին հրաժեշտ են տալիս ինքնասպանությամբ և գոնե պատմության համար փրկում սեփական ռենոմեն: Մինչդեռ մի կրակոցով «փրկվելու» արժանապատվությունը ոչ բոլորին է վիճարկված…
Ինչևիցե, իմ սերնդակիցների համար Քոչարյանը դիտվում և, երևի, դիտվելու է որպես ոչ ադեկվատ քաղաքական գործիչ:
Իր երկրի սահմանադրական կարգի «ոչնչացման ճարտարապետը» չլինելու, պատմության մեջ սև տառերով սեփական անունը չարձանագրելու համար նա ուներ բոլոր, բայց ամենից առաջ` արժանապատվորեն հեռանալու, հնարավորությունները: Մինչդեռ նա ուղղակիորեն չկարողացավ արժանի լինել պետության ղեկավարի շատ պատասխանատու կոչմանը:
Եվ նրա, պետք է համոզված լինել, վերջին հրապարակային հարցազրույցը «ինքնաոչնչացման» յուրատեսակ դրսևորում էր… Նրա խոսքում չկար երկիր կործանած մարդու պարագայում պարտադիր` ապաշխարության նշույլ իսկ: Իր երկրին և ժողովրդին նա բացարձակ օտար էր:
Նա կարող էր զբաղեցնել ցանկացած մեկ այլ ղեկավար պաշտոն մասնավոր ոլորտում, բայց ոչ երբեք` ինքնիշխան երկրի նախագահ, քաղաքական ֆիգուր, որ ունակ լիներ գնալու անձնական զոհաբերության, անգամ զրկվել կյանքից` հանուն իր երկրի:
Լինել պատերազմող երկրի նախագահ և ասել, թե տեղյակ չէ ՀՀ պաշտպանության նախարարի հրամանից և փորձել խուսափել պատասխանատվությունից՝ սա ոչ պարկեշտ մարդու վարք է: Ավելին, սա «անպատասխանատու» քայլ է: Աններելի…
Հ.Գ. Պաշտպանության նախարարի 0038 հրամանում առկա է հետևյալ ձևակերպումը, որ ի կատարումն գերագույն գլխավոր հրամանատարի, և ունենք տեսանյութ, որտեղ նախկին Պաշտպանության նախարար Միքայել Հարությունյանն ասում է՝ «բանակի ներգրավման համար էդ հարցն ինձ չպետք է տաք»։ Դժվար չէ կռահել, որ Միքայել Հարությունյանը նկատի է ունեցել հենց Ռոբերտ Քոչարյանին, երբ ասում է՝ «էդ հարցն ինձ մի տվեք, դուք չգիտե՞ք ում պետք է տաք»… Հետևաբար հեռու չէ այն օրը, երբ կպարզվի, որ Ռոբերտ Քոչարյանն իսկապես խախտելով Հայաստանի Հանրապետության Սահմանադրությունն անցել է նախագահի լիազորություններից և բանակը ներգրավել ներքաղաքական պրոցեսներին…
