«Հրապարակ» թերթը գրում է. Քաղաքացիական ավիացիայի վարչությունից մեզ պատմեցին, որ նորանշանակ նախագահ 30-ամյա Տաթեւիկ Ռեւազյանը հայերեն գրել-կարդալ չգիտի, մարդ է պահում, որ տեքստերն իր համար կարդա․ այդպես է աշխատում: Սա մի շարք օրենքների խախտում է՝ սկսած Սահմանադրությունից, վերջացրած պետական ծառայողի, լեզվի մասին օրենքներով:
Մենք դիմեցինք Քաղավիացիայի վարչություն, որտեղից ասացին․ «Վարչության նախագահի հայերեն գրելու, կարդալու, խոսելու մակարդակը բավարար է, եւ այժմ աշխատում է իր լեզվի իմացության մակարդակի բարելավման վրա:
Ինչ վերաբերում է այն տեղեկատվությանը, թե Տաթեւիկ Ռեւազյանը հատուկ մարդ է պահում, ով ամբողջ օրը տեքստերը կարդում է իր համար, որ լսելով հասկանա, չի համապատասխանում իրականությանը:
Ուղղակի պետք է հաշվի առնել այն փաստը, որ նա 5 տարեկանից ապրել է Դանիայում, ուսումն ստացել է անգլերեն եւ դանիերեն լեզուներով: Նշենք նաեւ, որ փաստաթղթաշրջանառությունն իրականացվում է հայերեն լեզվով»:
