ՀՖՖ-ն նոր հայտարարություն է տարածել` անդրադառնալով ՀՖՖ-ի ժողովին ընդունած որոշումներին. «ՀՖՖ-ն հարկ է համարում անդրադառնալ մամուլի և մասնավորապես միևնույն կենտրոնից ղեկավարվող և ակնհայտորեն պատվեր կատարող որոշ էլեկտրոնային լրատվամիջոցների կողմից ՀՖՖ-ի հասցեին ուղղված՝ չհիմնավորված, չճշտված, նշված կենտրոնի կողմից ուղղորդվող մեղադրանքներին, որոնք երբեմն համեմված են ՀՖՖ նախագահին, գործադիր կոմիտեի անդամներին և աշխատակազմին ուղղված վիրավորական արտահայտություններով: Ցավոք, լրատվամիջոցները և նրանց պատվիրատուները այդ նպատակով «օգտագործում» են նաև նախկինում ճանաչված վետերան ֆուտբոլիստների, որոնց հետ հարցազրույցներից հստակ երևում է, որ նրանք, մեղմ ասած տեղեկացված չեն ոչ ՀՀ օրենսդրությունից, ոչ ՖԻՖԱ-ի, ՈՒԵՖԱ-ի, ՀՖՖ-ի կանոնադրություններից ու կանոնակարգերից և շատ հաճախ՝ պատկերացում անգամ չունեն քննարկվող հարցի մասին: Նրանք տեղեկացված չեն կամ ձևացնում են, թե չգիտեն ՀՖՖ վերջին տարիների կատարած հսկայածավալ աշխատանքների և դրանց վերաբերյալ միջազգային ֆուտբոլային կառույցների կողմից տրված բարձր գնահատկանների մասին:
Հիմա անդրադառնանք լրատվության միջոցների որոշ հրապարակումների, որոնք վերաբերում են ՀՖՖ վերջին ժողովին:
ՀՖՖ անդամությունից 8 ակումբների հեռացման պատճառները և հիմքերը
Համաձայն մամուլի որոշ հրապարակումների` ՀՖՖ-ն իր անդամներից թվով ութ անդամների հեռացնելով, իբրև թե նպատակ է հետապնդել հեռացնելու ընդդիմադիր ակումբներին, որոնք հաջորդ ժողովներին կարող էին քվեարկել ընդդեմ ՀՖՖ ներկայիս ղեկավարությանը: Նշված և այլ բազմաթիվ հրապարակումներն ըստ էության հարցի թերի, սխալ ըմբռնման, իսկ որոշ դեպքերում նաև հանրությանը դիտավորյալ ապակողմնորոշելու միտում են հետապնդում:
ՀՖՖ-ն՝ իր գործունեության ամբողջ ընթացքում, իր իսկ կանոնադրության պահանջների կատարումն առավելագույնս ապահովելու նպատակով, ինչպես նաև նույն կանոնադրությամբ սահմանված իր և իր անդամների իրավունքների և պարտականությունների պատշաճ իրականացման համար պարբերաբար ստիպված է լինում անդրադառնալ նաև իր անդամների հեռացման հարցին: Դա նորություն չէ և նախկինում ևս անդամները, որոնք չեն կատարել իրենց կանոնադրական պարտականություները՝ նույնպես հեռացվել են ՀՖՖ կազմից:
Այս տարի անդամությունից հեռացվել են թվով 8 ակումբներ.
1. Արմավիր ՖԱ ՀԿ-ն
2. Հայ-Արի ՖԱ ՀԿ-ն
3. Էստեղլալ-Կոտայք ՖԱ ՀԿ-ն
4. Զվարթնոց –ՀԱՈՒ ՖԱ ՀԿ-ն
5. Միկա ՖԱ ՀԿ-ն
6. Ուլիս ՖԱ ՀԿ-ն
7. Ֆուրման Աբրահամյան ՖԱ ՀԿ-ն
8. Շիրակ ՖԱ ՀԿ-ն
Նշված ակումբներից առաջին չորսը՝ “Արմավիր ՖԱ” ՀԿ-ն, “Հայ-Արի ՖԱ” ՀԿ-ն, “Էստեղլալ-Կոտայք ՖԱ” ՀԿ-ն և “Զվարթնոց –ՀԱՈՒ ՖԱ” ՀԿ-ն դադարեցրել են իրենց գործունեությունը և լուծարվել են դեռևս 2017թ.-ի դեկտեմբերին: Նման պայմաններում և ամենամեծ ցանկության դեպքում անգամ՝ իրենք այլևս չէին կարող շարունակել իրենց ՀՖՖ անդամությունը և նրանց անդամության դադարեցումը կրել է զուտ տեխնիկական բնութ:
Միկա ՖԱ, Ուլիս ՖԱ եւ Ֆուրման Աբրահամյան ՖԱ ՀԿ-երը, դադարացնելով իրենց ֆուտբոլային գործունեությունը՝ վերջին մի քանի տարիների ընթացքում առհասարակ որևէ կապ ՀՖՖ հետ չեն պաշտպանել, անդամավճարի մասով կուտակել են երկար տարիների պարտքեր, որոնք ՀՖՖ բազմաթիվ պահանջներից հետո չեն վճարվել։ Ավելին, Միկա և Ուլիս ակումբներն անգամ պատվիրակներ չեն ներկայացնել ՀՖՖ նախորդ ժողովներին:
Ինչ վերաբերում է Շիրակ ֆուտբոլային ակումբի անդամության անմիջապես կասեցման եւ միաժամանակ անդամությունից հեռացման առաջարկին, ապա դա եղել է հարկադրված քայլ, որի համար հիմք են հանդիսացել վերջինիս կողմից ՖԻՖԱ-ի, ՈՒԵՖԱ-ի, ՀՖՖ Կանոնադրությանների եւ Կանոնակարգերի բազմակի, կոպիտ և գիտակցված խախտումները: Մասնավորապես, նշված ակումբն իր առջեւ դնելով ամեն գնով չեմպիոն դառնալու նպատակը՝ թույլ է տվել, որ իր պաշտոնատար անձը ներգրավվի պայմանավորված խաղի կազմակերպման մեջ, ինչի արդյունքում ՀՖՖ կարգապահական մարմինների կողմից կայացված որոշումների դեմ Սպորտային Արբիտրաժային դատարան սահմանված կարգով բողոք ներկայացնելու փոխարեն՝ ՀՖՖ-ի դեմ ներկայացվել են հայցեր ընդհանուր իրավասության դատարաններ: Դրանով և գիտակցաբար՝ ակումբն ըստ էության ակնկալիք է ունեցել եւ նախաձեռնել է ՀՖՖ ներքին գործերին պետության կողմից միջամտության գործընթացը, շատ լավ հասկանալով, որ նման միջամտությունը շատ վտանգավոր է եւ կարող է կործանարար հետեւանքներ ունենալ հայկական ֆուտբոլի համար, քանի որ ցանկացած նման տեսակի պետական միջամտություն կարող է պատճառ հանդիսանալ ՖԻՖԱ-ի կողմից ՀՖՖ-ին որակազրկելուն։
Բոլոր նրանք, ովքեր հետեւում եմ ԶԼՄ-ների հրապարակումներին, կհաստատեն այն, որ Շիրակ ՖԱ-ն նախաձեռնել է նաեւ ՀՖՖ հեղինակության եւ իմիջի դեմ ուղղված սեւ PR –ի գործընթաց, որի միակ նպատակը եղել է իրենց կողմից կատարված արարքից հանրության ուշադրության շեղումը, ինչպես նաեւ բոլոր հնարավոր մեղադրանքների սլաքը դեպի ՀՖՖ ուղղումը։
Այսպիսով՝ Շիրակ Ֆուտբոլային ակումբի կողմից խախտվել են ՀՖՖ կանոնադրության 6-րդ գլխի 2-րդ կետով սահմանված անդամի պարտականությունների գերակշիռ մասը, որն էլ պատճառ է հանդիսացել վերջինիս ՀՖՖ անդամությունից հեռացման համար:
Առևտրային կազմակերպությունները ևս կարող են անդամագրվել ՀՖՖ-ին
Մամուլում շատ էին նաև նոր անդամագրված անդամների վերաբերյալ տարաբնույթ մեկնաբանությունները: Մասնավորապես, հարց էր առաջացել այն մասին, որ ՀՖՖ-ն, խախտելով իր իսկ կանոնադրությունը, հասարակական կազմակերպությունների հետ մեկտեղ անդամագրել է նաև առևտրային կազմակերպությունների: Նշված հրապարակումները նույնպես իրավիճակը խեղաթյուրված ներկայացնելու նպատակ են հետապնդում:
ՀՀ քաղաքացիական օրենսգրքի նախկինում գործող 125 հոդվածը սահմանափակում էր իրավաբանական անձանց միության մեջ առևտրային և ոչ առևտրային կազմակերպությունների համատեղ անդամակցությունը, այսինքն իրավաբանական անձանց միությունները պետք է բաղկացած լինեին կամ միայն առևտային, կամ էլ միայն ոչ առևտրային կազմակերպություններից:
Հայաստանի Ֆուտբոլի Ֆեդերացիան երկար տարիներ պայքարել է այդ սահմանափակումը վերացնելու ուղղությամբ, անգամ օրենսդրական մի շարք նախաձեռնություններ են ներկայացվել Ազգային Ժողով ՀՖՖ գործադիր կոմիտեի անդամ ԱԺ պատգամավորների միջոցով: Այդ սահմանափակման հետևանքով էր, որ “ՖԱ Արարատ“ ՀՁ ՓԲԸ-ն երկար տարիներ հնարավորություն չուներ անդամագրվելու ՀՖՖ-ին:
ՀՖՖ կանոնադրությունը սակայն հստակ սահմանում է, որ Քաղաքացիական օրենսգրքում համապատասխան փոփոխություններ կատարելու դեպքում, ՀՖՖ-ին կարող են անդամագրվել նաև առևտրային կազմակերպությունները:
ՀՀ քաղաքացիական օրենսգրքում կատարված փոփոխությունների հետևանքով, որոնք ուժի մեջ են մտել 2017թ-ի փետրվարի 4-ից, վերացվել են վերը նշված սահմանափակումները, դրա հետևանքով էլ այս տարի մեծ քանակով ակումբներ, այդ թվում նաև “Արարատ ՖԱ” ՀՁ ՓԲԸ-ն, հնարավորություն ստացան անդամագրվել ՀՖՖ-ին:
ՀՖՖ անդամությունից հեռացնելը՝ արգելք չէ ՀՖՖ հովանու ներքո անցկացվող մրցաշարերում մասնակցությանը
Շատ ֆուտբոլասերներ մտահոգություն են հայտնում, որ օրինակ “Շիրակ ՖԱ” ՀԿ-ին ՀՖՖ անդամությունից հեռացնելով, ՀՖՖ-ն զրկել է ակումբին ՀՀ առաջնություններին մասնակցելու հնարավորությունից: Նշված մտահոգություններն անտեղի են, քանի որ ՀՖՖ մրցաշարերին մասնակցությունն առհասարակ որևէ կերպ կաշկանդված չէ ՀՖՖ անդամության հանգամանքով: Բոլոր ակումբները, անկախ այն հանգամանքից նրանք հանդիսանում են ՀՖՖ անդամ թե ոչ՝ ցանկության դեպքում կարող են մասնակցել ՀՖՖ մրցաշարերին»,- նշված է հայտարարության մեջ:
