Հայաստանի և Բելգիայի 13 քաղաքացի է բերման ենթարկվել Բրյուսելում` թենիսի ցածր վարկանիշ ունեցող մրցաշարերում պայմանավորված խաղեր կազմակերպելու կասկածանքով:
Այս մասին, armsport.am-ի տեղեկացմամբ, հայտնում է «Reuters»-ը:
Բելգիայի դաշնային դատախազության վարկածով, մի խումբ մարդիկ 2014 թվականից ի վեր կաշառել են «ֆյուչերս» և «չելենջեր» կատեգորիայի մրցաշարերի թենիսիստներին:
Նման մրցաշարերի ընտրությունը պայմանավորված է նրանով, որ դրանք հազվադեպ են տեսանկարահանվում, իսկ հեռուստատեսությամբ գրեթե երբեք չեն հեռարձակվում:
Ընթանում է քննություն: Բելգիայի դատախազությունը հայտնում է կասկածյալների բնակարաններում հետախուզության և նրանց հնարավոր ձերբակալության մասին:
