Թբիլիսիի մետրոպոլիտենի գնացքավարները գործադուլ են սկսել, որի մասին հայտարարել էին կիրակի: Նրանք պահանջում են բարձրացնել աշխատավարձերը, այլապես՝ կդադարեցնեն մետրոյի աշխատանքը «Մեզանից ոչ ոք չի կարող պատասխանատվություն ստանձնել ուղևորների անվտանգ փոխադրման համար»,- Интерфакс-ի փոխանցմամբ՝ նշել է ակցիայի մասնակիցներից մեկը:
Ավելի վաղ Թբիլիսիի քաղաքային դատարանը նրանց արգելել էր գործադուլ անցկացնել աշխատանքային ժամերին:
Ակցիայի մասնակիցներից մեկի խոսքով՝ չնայած դատարանի արգելքին, գնացքավարները կշարունակեն բողոքի ցույցերը ոչ աշխատանքային ժամերին:
Թբիլիսիի քաղաքապետ Կախա Կալաձեն հայտարարել է, որ ո՛չ տրանսպորտային ընկերությունները, ո՛չ քաղաքապետարանն այս պահին հնարավորություն չունեն բարձրացնելու նրանց աշխատավարձերը, որոնք տատանվում են 1400-1800 լարիի սահմանում (մոտ 566-772 դոլար):
