«Իրատես» թերթը գրում է. «Այս օրերին կառավարության առաջնահերթությունները ստվերել են ոչ վաղ անցյալում հարթակից հնչած մեկ այլ կարևոր քայլ՝ արտահերթ ընտրությունների անցկացումը: Այս կառավարությունը սկզբից իրեն հռչակեց ժամանակավոր, որպեսզի ԸՕ-ի փոփոխություններ անի և նոր ընտրություններ հայտարարի: Սակայն և՛ իշխանությունը, և՛ ընդդիմությունը՝ ՀՀԿ-ն (այնքա՜ն խորթ է հնչում հանրապետականին ընդդիմություն համարելը), կարծես մտադիր չեն շտապողականություն ցուցաբերելու այս հարցում:
Նիկոլ Փաշինյանի թիմը փորձում է «լավ» կառավարության ծրագիր ներկայացնել, իսկ ՀՀԿ-ն այն հաստատապես չի մերժի, որպեսզի խորհրդարանն ազատ չարձակվի: Ավելին, ՀՀԿ-ին էլ բացարձակ ձեռնտու չէ այս պահին արտահերթ ընտրությունների անցկացումը:
Թե Փաշինյանի կառավարությունը ինչ սահմանադրական ճանապարհ կգտնի արտահերթ ընտրությունների իրագործման հարցում, կերևա առաջիկայում, բայց ԸՕ-ի փոփոխությունները, մեր տեղեկություններով, ՀՀԿ-ն անկասկած տապալելու է, որովհետև չի ցանկանում այլ ընտրակարգով գնալ ընտրությունների:
Այս հարցում ՀՀԿ-ից համաձայնություն կորզելու համար ամիսներ կպահանջեն, այնպես որ, առաջիկայում պետք չէ սպասել արտահերթ ընտրություններ»:
Մանրամասը՝ թերթի այսօրվա համարում:
