Ոստիկանության Երեւան քաղաքի վարչության Ձերբակալվածների պահման վայրում գտնվող ԱԺ պատգամավոր Արարատ Միրզոյանին նրա պաշտպան Նիկոլայ Բաղդասարյանը չի կարողանում տեսակցել:
«Ըստ Քրեական օրենսգրքի՝ անհապաղ իր տեսակցությունը պետք է ապահովվի, մինչդեռ, տեսակցություն թույլ չի տրվում»,- ասում է պաշտպանը:
Նրա խոսքերով՝ այստեղ գտնվող պատգամավորները եւ փաստաբանները մոտ կես ժամ է չեն կարողանում տեսակցել նրան:
Պաշտպանը նաեւ տեղեկացրեց, որ դիմում են պատրաստել ՄԻԵԴ-ին ներկայացնելու համար. «Արտակարգ կարգով այդ դիմումը պետք է քննվի եւ մինչեւ երեկո որոշում կայացվի անհապաղ իրենց ազատ արձակելու մասին: Իսկ դրա համար պետք է ստորագրել լիազորագրերը, սակայն այս պահին խոչընդոտվում է լիազորագրերի ստորագրման գործընթացը»,- ասաց պաշտպանը:
Ի դեպ, այսօր փոխվարչապետ Կարեն Կարապետյանը հայտարարել է, որ որոշում է կայացվել ԱԺ պատգամավորներ Նիկոլ Փաշինյանին, Արարատ Միրզոյանին և Սասուն Միքայելյանին պատգամավորական անձեռնմխելիությունից զրկելու վերաբերյալ ՀՀ գլխավոր դատախազի դիմումն Ազգային ժողովից հետ վերցնել։
