Պաշտպանական գնումների դեպարտամենտի ղեկավար Վլադիմիր Վերտելեցկին կալանավորվել է կաշառք վերցնելու կասկածանքով, հայտնում է «Известия»-ն՝ հղում անելով ՌԴ ՊՆ-ի աղբյուրին։
Զրուցակցի խոսքով՝ ինքը բիզնեսմենին օգնել է պետական պատվեր ստանալ, որպես կաշառք ստացել է տուն ու ավտոմեքենա։
Ավելի վաղ այդ օրը հայտնի դարձավ ՌԴ Զինված ուժերի (ԶՈՒ) կապի գլխավոր տնօրինության պետ, Գլխավոր շտաբի պետի տեղակալ, գեներալ-լեյտենանտ Վադիմ Շամարինի ձերբակալության մասին։ Նա մեղադրվում է առանձնապես խոշոր չափերով կաշառք ստանալու մեջ։ 235-րդ կայազորային զինվորական դատարանը հայտնել է, որ գեներալը մեղադրյալ է Ռուսաստանի Դաշնության Քրեական օրենսգրքի 290-րդ հոդվածի 6-րդ մասով («Առանձնապես խոշոր չափերով կաշառք ստանալը») հարուցված քրեական գործով։
Մինչ այս՝ մայիսի 21-ին, 235-րդ կայազորային զինվորական դատարանը երկու ամսով կալանավորել էր ՌԴ ԶՈւ 58-րդ բանակի նախկին հրամանատար Իվան Պոպովին։ Նա ձերբակալվել է խարդախության կասկածանքով։ Ինչպես հայտնել է ՌԴ Քննչական կոմիտեի (ՔԿ) պաշտոնական ներկայացուցիչ Սվետլանա Պետրենկոն, Պոպովը անցյալ տարի ներգրավված է եղել ավելի քան 1,7 հազար տոննա մետաղական գլանվածքի գողության մեջ՝ ավելի քան 130 մլն ռուբլի արժողությամբ, որոնք ձեռք է բերել Զապորոժիեի շրջանի ռազմաքաղաքացիական վարչակազմը՝ մարդասիրական օգնություն ցուցաբերելու համար։
Բացի այդ, մայիսի 14-ին Քննչական կոմիտեն քրեական գործ է հարուցել առանձնապես խոշոր չափերով կաշառք ստանալու դեպքի առթիվ ՌԴ ՊՆ անձնակազմի վարչության պետ Յուրի Կուզնեցովի նկատմամբ։ Դատարանը խափանման միջոց է ընտրել կալանավորումը։ Հետաքննության տվյալներով՝ Կուզնեցովը, որպես ՌԴ Զինված ուժերի գլխավոր շտաբի 8-րդ տնօրինության պետ, կաշառք է ստացել «առևտրային կառույցների ներկայացուցիչներից՝ իրենց օգտին որոշակի գործողություններ կատարելու համար»։
Ապրիլի 23-ին կաշառք վերցնելու կասկածանքով բերման է ենթարկվել նաեւ ՌԴ պաշտպանության փոխնախարար Թիմուր Իվանովը։ Հաջորդ օրը նա ձերբակալվել է մինչև հունիսի 23-ը։ Նախկին պաշտոնյան մեղադրվում է ՊՆ կապալառուներին գույքային օգուտ ստանալու դիմաց պաշտպանություն ապահովելու մեջ։ Գործի շրջանակներում նրանք ձերբակալել են նաև Սերգեյ Բորոդինին, ով բարեկամական հարաբերությունների մեջ է եղել նախկին փոխնախարարի, ինչպես նաև OlimpCityStroy ՍՊԸ-ի համահիմնադիր Ալեքսանդր Ֆոմինի հետ։
