Երեկ՝ ապրիլի 19-ին, սպանություն է տեղի ունեցել Արմավիրի մարզում։ Ժամը 21։30-ի սահմաններում ՀՀ ՆԳՆ ոստիկանություն տեղեկություններ են ստացվել, որ Գեղակերտ գյուղի տներից մեկում վիճաբանություն է տեղի ունեցել, որի հետևանքով 1 հոգի դանակահարված տեղափոխվել է հիվանդանոց։ Ինչպես հայտնում է ֆոտոլրագրող Գ․ Շամշյանը, պարզվել է, որ վիրավորը Գեղակերտ գյուղի բնակիչ, 62-ամյա Ներսես Ալեքսանյանն է։ Ոստիկաններն ու քննիչները պարզել են նաև, որ նույն օրը, կենցաղային հարցերի շուրջ ծագած վիճաբանության ժամանակ, Ն․ Ալեքսանյանի տղան, 38-ամյա Վահե Ալեքսանյանը, խոհանոցային դանակով մի քանի հարված է հասցրել հոր կրծքավանդակին, ինչի հետևանքով վերջինը ծայրահեղ ծանր ախտորոշմամբ տեղափոխվել է հիվանդանոց։ Ավելի ուշ պարզվել է, որ Ն․ Ալեքսանյանը, վիրահատարանում գիտակցության չգալով, մահացել է։
Դեպքի փաստով Վաղարշապատի քննչական բաժնում «սպանություն» հատկանիշներով նախաձեռնվել է քրեական վարույթ։Կասկածյալը ոստիկանության Վաղարշապատի բաժնից ներկայացվել է ՀՀ Քննչական կոմիտեի Արմավիրի մարզային քննչական վարչության Վաղարշապատի քննչական բաժին, որտեղ քննիչի որոշմամբ ձերբակալվել է։
Ոստիկաները հայտնաբերել են նաև հանցագործության գործիք դանակը։
