Գեղարքունիքի մարզում 19-ամյա զինծառայողի հարզենային վնասվածքի դեպքով նախաձեռնվել է քրեական վարույթ։
Այս մասին «Հայկական ժամանակ»-ին հայտնեց քննչական կոմիտեի մամուլի քարտուղար Գոռ Աբրահամյանը։
«Կատարվել է դեպքի վայրի զննություն, հարցաքննվել են բազմաթիվ համածառայակիցներ։ Քրեական վարույթը նախաձեռնվել է՝ ՀՀ քրեական օրենսգրքի 528-րդ հոդվածի 1-ին մասով (առողջությանը վնաս պատճառելը, որը հանգեցրել է կամ կարող էր հանգեցնել զինվորական ծառայության կամ դրա առանձին պարտականությունների կատարումը ժամանակավորապես դադարեցնելուն) Հանգամանքները պարզվում են»,- նշեց նա։
Ավելի վաղ հայտնել էինք, որ ապրիլի 11-ին 19-ամյա զինծառայողը ձախ ոտնաթաթի հրազենային վնասվածքով տեղափոխվել է հիվանդանոց։
«Հայկական ժամանակ»-ի հետ զրույցում ՀՀ պաշտպանության նախարարի մամուլի քարտուղար Արամ Թորոսյանը նշել էր, որ զինծառայողի վնասվածքը աննշան է, կյանքին վտանգ չի սպառնում։
