Քրիստոսի Հարության ավետիսը հնչել է Ոսկեպարի 7-րդ դարում կառուցված Սուրբ Աստվածածին եկեղեցում։
Հայաստանի տարբեր շրջաններից ու աշխարհի տարբեր կետերից մի խումբ ուխտավորներ Ոսկեպարում աղոթք են արել՝ Տավուշի թեմի առաջնորդ Տեր Բագրատ արքեպիսկոպոս Գալստանյանի հանդիսապետությամբ:
Բազմամարդության պատճառով Սուրբ Հարության աղոթքը կատարվել է Ոսկեպարի Սուրբ Աստվածածին եկեղեցու բակում։
«Մեր հայրենիքն այսօր մեր ոտքերի տակ է տնքում, մեր սրտերում է տնքում։ Իր ամբողջությամբ մեզ կանչում է և այդ կանչն է, որ այսօր այստեղ է բերել բոլորիդ։ Ընտրություն եք կատարել լինել հենց այստեղ, սահմանագլխին, 30 տարի շարունակ հայրենիքի դարպասը բռնած այս սահմանագլխին։ Ընդամենը մի քանի մետր է մեր հողում գտնվող թշնամին մեզնից հեռու։ Սա պետք է պատգամ ու ուղերձ լինի հենց այստեղից՝ սա ոչ ոսկեպարցու, ոչ բաղանիսցու, ոչ կիրանցու խնդիրն է, բոլորը միասին մեր բոլորի խնդիրն է, հայոց ճակատագրի վճռական ժամերի խնդիրն է»,- իր խոսքում ասել է Բագրատ Սրբազանը։
