Լեմկինի անվան Ցեղասպանության կանխարգելման ինստիտուտը հայտարարել է կարմիր դրոշով տագնապ՝ հայ-ադրբեջանական սահմանին իրադրության սրման սպառնալիքի պատճառով և Հայաստանի կառավարությանը կոչ է արել զգուշանալ Բաքվի պահանջով Սահմանադրության և պետական խորհրդանիշների փոփոխություններից: «Նման առաջարկները մտահոգիչ են, քանի որ կարող են ամրապնդել նախագահ Ալիևի շարունակվող հռետորաբանությունը և դրա գաղափարական հիմքերը», – գրել է ինստիտուտը Սահմանադրության և պետական խորհրդանիշներում փոփոխություններ մտցնելու, այդ թվում՝ զինանշանի վրա Արարատ լեռան առկայությունը վիճարելու Երևանի մտադրության մասին:
Լեմկինի ինստիտուտը Հայաստանի օրենսդրության մեջ փոփոխություններ մտցնելու Բաքվի պահանջները կապեց Երևանի ինքնիշխանության իրավունքի անտեսման և միջազգայնորեն ճանաչված Հայաստանի տարածքի որոշ հատվածներ զավթելու ցանկության հետ։ Ինստիտուտը քննադատել է նաև Կրթության նախարարության առաջարկը՝ փոխել «Հայ ժողովրդի պատմություն» դպրոցական առարկան «Հայաստանի պատմության», քանի որ դա կհանգեցնի պատմության խեղաթյուրմանը և Հայոց ցեղասպանության նման կարևոր փուլերի անբավարար լուսաբանմանը։ «Տագնապալի է, որ դա թույլ կտա ցեղասպանությունը ժխտողներին, ինչպիսիք են Ադրբեջանը և Թուրքիան, նսեմացնել կամ նույնիսկ ջնջել իրենց դերը կամ պատասխանատվությունը պատմական իրադարձություններում, որոնք կարող են բացասաբար ազդել իրենց կառավարությունների քաղաքական օրակարգերի և/կամ ազգային ինքնության վրա»,- ասվում է ուղերձում: Ինստիտուտը նաև նախազգուշացրել է, որ Ադրբեջանի կողմից Հայաստանի զինված ուժերի «սադրանքների» մեղադրանքները կարող են լինել «հայելային» ռազմավարության մի մասը, որը Բաքուն օգտագործում է խոշոր հարձակման նախապատրաստման համար։
Լեմկինի ինստիտուտը նաև զգուշացրել էր 2023 թվականի նոյեմբերին Ադրբեջանի կողմից Հայաստան ներխուժելու սպառնալիքի մասին։ Հունվարի 24-ին ԱԳ նախարար Արարատ Միրզոյանը հայտարարել էր, որ Բաքուն խնդիր է համարում Հայաստանի Սահմանադրության մեջ պարունակվող երկրի Անկախության հռչակագրին հղումը։ Ադրբեջանի նախագահ Իլհամ Ալիևը Հայաստանի հետ հաշտության պայմանագրի ստորագրման պայման էր անվանել Հայաստանի Սահմանադրության փոփոխությունը՝ մի քանի այլ փաստաթղթերի հետ միասին։ Փետրվարի 22-ին Հայաստանի վարչապետ Նիկոլ Փաշինյանը France 24-ին տված հարցազրույցում հայտարարել էր, որ Ադրբեջանը պատրաստվում է նոր պատերազմի։
