Պաշտոնական Բաքվից վերջին օրերին հնչող մի շարք հայտարարություններ Հայաստանի օրենսդրական դաշտի մասին, մեր երկրի ինքնիշխանության խախտում են եւ միջամտություն մեր երկրի ներքին գործերին: Այս մասին այսօր՝ փետրվարի 15-ին, կառավարության նիստում հայտարարեց ՀՀ վարչապետ Նիկոլ Փաշինյանը:
«Փորձերը մեկնաբանելու, թե Հայաստանի օրենսդրությունում խաղաղության պայմանագրի ստորագրմանը խանգարող որեւէ դրույթ կա, իրականության հետ որեւէ կապ չունեն:
Ինչպես ասել եմ՝ խաղաղության պայմանագրի բանակցությունների ընթացքում Հայաստանին եւ Ադրբեջանին հաջողվել է մի շարք հոդվածների վերաբերյալ համաձայնության գալ եւ դրանցից մեկն այն մասին է, որ կողմերը չեն կարող հղում անել իրենց օրենսդրության վրա՝ խաղաղության պայմանագրի որեւէ դրույթի կատարումից հրաժարվելու համար: Հետեւաբար, ՀՀ օրենսդրության մեջ խաղաղության պայմանագրի իրագործմանը խոչընդոտող որեւէ դրույթ չկա: Սա ոչ միայն քաղաքական, այլեւ փորձագիտական գնահատական է»,-ասաց նա:
Հիշեցնենք, որ Ադրբեջանի նախագահ Իլհամ Ալիեւը հայտարարել է՝ եթե Հայաստանն իր օրենսդրությունը չբերի նորմալ վիճակի, խաղաղության պայմանագիր չի կնքվի:
