Արցախի խորհրդարանի մեծությամբ առաջին «Ազատ Հայրենիք-ՔՄԴ» խմբակցության անդամ Արամայիս Աղաբեկյանը հեռացել է դաշինքից՝ հայտնելով, որ պատճառը «Արցախի լուծարման մասին հրամանագիրը չեղարկելու հարցում իր և խմբակցության բացարձակ մեծամասնության միջև առկա տարբեր դիրքորոշումներն են»։
Աղաբեկյանը ֆեյսբուքյան իր էջում համոզմունք է հայտնել, որ հրամանագրի չեղարկման մասին պետք է հրապարակայնորեն հայտարարվի նույն հարթակում, որում հայտարարվել է դրա ստորագրման մասին։
«Իրավական տեսանկյունից ոչ մի արժեք չներկայացնող այս փաստաթուղթը քաղաքական և տեղեկատվական առումով երազանքների նվեր է Ադրբեջանին։ Խմբակցության մեծամասնության կարծիքը այլ է, նրանք համոզված են, որ գոյություն ունեցող սպառնալիքներն ու փաստաթղթի իրավական արժեքի բացակայությունը բավարար են, որպեսզի չեղարկում և այդ չեղարկման հանրայնացում չկատարվի։ Ադրբեջանի կողմից «Արևմտյան Ադրբեջան» կոնցեպտի՝ Միլի Մեջլիս բերելուց և սեփական իրավական դաշտում ամրագրելուց հետո Արցախի լուծարման մասին հրամանագրի չեղարկման շուրջ տարակարծությունները, ըստ իս, պիտի վերացվեին։ Այս պահին, ցավոք, նման փոխըմբռնում չկա»,- գրել է արցախցի պատգամավորը։
Աղաբեկյանը, միաժամանակ, վստահություն է հայտնել, որ Ազգային Ժողովում, այդ թվում՝ իր խմբակցությունում կան մարդիկ, որոնք ներքին համոզմունքով նույն կերպ են մտածում, սակայն չեն ցանկանում հրապարակայնորեն արտահայտվել։
«Խնդրում և պահանջում եմ Արցախի Ազգային Ժողովի պատգամավորներից, Հայաստանի Հանրապետության քաղաքական դերակատարներից, Սփյուռքի ազդեցիկ ուժերից հրապարակայնորեն դիմել Արցախի նախագահ Սամվել Շահրամանյանին` հայտնի հրամանագրի չեղարկման և հանրայնացման պահանջով։ Ինչո՞ւ եմ հիմա գրում այս մասին և ոչ, օրինակ, մեկ ամիս առաջ, որովհետև ներքին հնարավոր բոլոր մեթոդները օգտագործել եմ, անգամ հաջողվել է այդ ուղղությամբ որոշակի առաջընթաց արձանագրել, սակայն վերջնական արդյունքի, որպես այդպիսին, հասնել չի հաջողվել։ Արցախի և արցախցիների իրավունքների համար պայքարը չի ավարտվել, այն թևակոխել է ավելի դաժան փուլ, որտեղ ամեն կողմից մեզ համոզելու են հակառակը և ճնշելու են բոլոր հնարավոր միջոցներով։ Առավել քան երբևէ անհրաժեշտ է պինդ լինել»,- նշել է արցախցի պատգամավորը։
