Գոռն ու Անին ամուսնացան 2023 թվականի ապրիլի 21-ին։ Բայց երիտասարդ զույգի սիրո ուղին սկսվել էր դեռևս 2017 թվականին։ Կինը` Անի Ղուկասյանը, հիշում է այն օրը․ 2017-ի մարտի 21-ն էր, երբ սկսեցին իրենց պարբերական հանդիպումները։ Պատմում է Հանրային ռադիոն։
Նույն դպրոցում էին սովորում՝ զուգահեռ դասարաններում։ Զրույցի ընթացքում Անիի կոկորդը հուզմունքից սեղմվում է, արտասուքը թաքցնել չի կարողանում։ Ուզում է՝ շատ բան պատմել իր սիրելիի մասին։ Ուզում է՝ բոլորը ճանաչեն ու գնահատեն իր Գոռին, իր միշտ երիտասարդ ու սիրելի Գոռին։
Անին այսօր ապրում է ամուսնու հետ անցկացրած բարի ու անմոռանալի հիշողություններով։ Փողոցով քայլելիս ամենուր նրան է փնտրում։
