2019 թվականին դատարանների մուտքերը շրջափակելու ակցիան շատերը փորձում էին ներկայացնել որպես արդարադատությունը խոչընդոտելու փորձ։ Այս մասին այսօր՝ դեկտեմբերի 6-ին, ԱԺ-ում 2024-ի բյուջեի երկրորդ ընթերցմամբ քննարկման ժամանակ իր ամփոփիչ ելույթում նշեց ՀՀ վարչապետ Նիկոլ Փաշինյանը:
«Իրականում մենք դատարանների դռները մի քանի ժամով փակել էինք արդարադատության դռները բացելու համար։ Բայց պետք է արձանագրեմ, որ արդարադատության դռները դեռևս լիարժեք, բավարար չափով բացված չեն։
Ուրեմն ինչ է պետք անել։ Իմ համոզմունքը շարունակում է լինել այն, որ մեր անելիքը պետք է մնա ինստիտուցիոնալ բարեփոխումների իրականացումը, մենք պետք է կենդանի պահենք արդարադատության հանրային պահանջը՝ ի հեճուկս բոլոր դժվարությունների, անսասան պետք է պահենք մեր հավատը դատական անկախ համակագ ունենալու իդեալի նկատմամբ»,- ասաց նա։
«Այդ գործընթացում էական է ԱԺ-ի դերը: Դատական համակարգում պետք է ընտրվեն միայն այն թեկնածուները, որոնք հավատում են արդարությանն ու արդարադատությանը, անկախ դատական համակարգին և ունեն բարեվարքության պատշաճ աստիճան»,- ասաց վարչապետը:
