ԵՄ պաշտոնյան պնդում է, որ Արաբական Միացյալ Էմիրությունները (ԱՄԷ) համաձայնել են նվազեցնել որոշ ապրանքների Ռուսաստան մատակարարումների ծավալը։ Այս մասին հայտնում է Bloomberg-ը՝ հղում անելով իր աղբյուրներին։
Նրանց տեղեկություններով՝ Եվրահանձնաժողովն այս շաբաթ արդեն տեղեկացրել է ԵՄ երկրների դեսպաններին այս որոշման մասին։ Բացի այդ, Թուրքիան դիտարկում է նմանատիպ միջոցներ, սակայն պաշտոնական մեկնաբանություններ դեռևս չի ներկայացրել։
Սեպտեմբերի 21-ին Bloomberg-ը հաղորդել է, որ ԱՄԷ-ն ուսումնասիրում է երկակի նշանակության ապրանքների արտահանման հատուկ հսկողություն սահմանելու հնարավորությունը, որոնք ենթակա են ԱՄՆ-ի և ԵՄ-ի պատժամիջոցներին:
ԱՄԷ-ն պահպանում է ապրանքների և տեխնոլոգիաների ցանկը, որոնք ենթակա են արտահանման հսկողության, բայց դա սահմանափակվում է հիմնականում նավթաքիմիական արտադրանքով: Ըստ Bloomberg-ի աղբյուրների՝ երկրի իշխանությունները մտադիր են ընդլայնել այս ցուցակը՝ ավելացնելով 45 կատեգորիաներ երկակի նշանակության ապրանքների, որոնք հայտնվել են ԱՄՆ-ի և ԵՄ-ի նմանատիպ ցուցակներում։ Արդյունքում, տեղական ընկերություններից, որոնք վերաարտահանում են համապատասխան արտադրանք, կպահանջվի ապացուցել, որ դրանք նախատեսված են քաղաքացիական օգտագործման համար:
Bloomberg-ը արտահանման վերահսկողությունն ընդլայնելու մտադրությունը կապում է Բրյուսելի և Վաշինգտոնի մտահոգությունների հետ, որոնք ճնշում են գործադրում Աբու Դաբիի վրա՝ կապված Մոսկվային պատժամիջոցների տակ գտնվող ապրանքների, այդ թվում՝ համակարգչային չիպերի և այլ էլեկտրոնային բաղադրիչների ենթադրյալ մատակարարման հետ: Արևմտյան երկրների իշխանությունները կարծում են, որ Ռուսաստանը օգտագործում է ԱՄԷ-ից մատակարարվող երկակի նշանակության ապրանքներ՝ Ուկրաինայում օգտագործվող զենքեր արտադրելու համար։
