Լրագրող Ոսկան Սարգսյանը ֆեյսբուքյան իր էջում գրում է.
Դիլիջան համայնքի ղեկավար Դավիթ Սարգսյանը դիմել է համայնքի ավագանուն, հայտնելով, որ Դիլիջան համայնքի ղեկավարին է դիմել <<ԳՐԻԻՆ ՌՈՔ ՄԵՆԵՋՄԵՆԹ ԳՐՈՒՊ>> ՍՊԸ-ն , ի դեմս՝ տնօրեն Վարազդատ Ներսիսյանի՝ հայտնելով, որ ընկերության սեփականությունը հանդիսացող Դիլիջան քաղաքի Մաքսիմ Գորկու փողոցի թիվ 3/1 հասցեի 2800 քմ մակերեսով հողամասում է գտնվում դեռևս 1936թ․ կառուցված Աղասի Խանջյանի ամառանոցի շենքը, որը ՀՀ կառավարության 2004թ․ դեկտեմբերի 30-ի N 1929-Ն որոշման համաձայն ընդգրկված է ՀՀ Տավուշի մարզի պատմության և մշակույթի անշարժ հուշարձանների պետական ցուցակում որպես հանրապետական նշանակության հուշարձան։ Այդ շենքը ՀՀ կադաստրի կոմիտեի կողմից հաշվառված է որպես ինքնակամ շինություն, վթարային է և գտնվում է կիսավեր վիճակում։ Ընկերությունը, կարևորելով հուշարձանների պահպանման և վերականգնման անհրաժեշտությունը, պատրաստակամություն է հայտնել ընկերության սեփականությունը հանդիսացող 2800քմ հողամասը, վերջինում առկա հուշարձան հանդիսացող շենքի պահպանման և սպասարկման նպատակով, որպես սեփականություն անհատույց փոխանցել /նվիրել/ Դիլիջան համայնքին։
Դիլիջանի համայնքի ղեկավարն առաջարկություն է ներկայացրել համայնքի ավագանուն՝ <<ԳՐԻԻՆ ՌՈՔ ՄԵՆԵՋՄԵՆԹ ԳՐՈՒՊ>> ՍՊԸ-ի կողմից, Դիլիջան քաղաքի Մաքսիմ Գորկու փողոցի թիվ 3/1 հասցեի 2800 քմ հողամասը, վերջինում առկա հուշարձան հանդիսացող շենքի պահպանման և սպասարկման նպատակով, որպես նվիրատվություն Դիլիջանի համայնքին ընդունելու համաձայնություն տալու վերաբերյալ։ Համայնքի ավագանին 2023թ․ նոյեմբերի 2-ի նիստում քվեարկությամբ հավանություն է տվել նշված 2800 քմ հողամասը ընդունելու մասին համայնքի ղեկավարի առաջարկությանը: <<ԳՐԻԻՆ ՌՈՔ ՄԵՆԵՋՄԵՆԹ ԳՐՈՒՊ>> ՍՊԸ-ի ինտերնետային էջում որպես այդ ընկերության հիմնադիր նշված էԴիլիջանում ծնված, Շվեյցարիայում ապրող Մարետա Գևորկյանը, ով որպես ձեռնարկատեր միանձնյա տիրապետում է Հայաստանում գործող Evocabank-ի բաժնետոմսերի 100%-ին։2019թվականին լրագրողական նյութի էի պատրաստում Դիլիջանում Խանջյանի ամառանոցի մասին, այն ժամանակ Դիլիջանի քաղաքապետարանից ասացին, որ 2014 կամ 2015թվականներին այդ տարածքը մասնավոր գործարարից գնել է հայտնի գործարար Ռուբեն Վարդանյանը։
Արցախում ադրբեջանցիների կողմից Ռուբեն Վարդանյանին կալանավորելը կապ ունի՞ վերոհիշյալ ամառանոցը՝ 2800քմ տարածքով Դիլիջան համայնքին նվիրաբերելու հետ, թե՞ <<ԳՐԻԻՆ ՌՈՔ ՄԵՆԵՋՄԵՆԹ ԳՐՈՒՊ>> ՍՊԸ-ն նոր իմացավ, որ այդ տարածքում պատմության և մշակույթի հուշարձան է գտնվում։
