Հայաստանի պաշտպանական ծախսերը 2024 թվականին 2018 թվականի համեմատությամբ նախատեսվում է ավելացնել 125%-ով կամ 309 մլրդ դրամով։ Այս մասին Ազգային ժողովում հոկտեմբերի 30-ին 2024 թվականի պետական բյուջեի նախագծի քննարկման ժամանակ մշտական խորհրդարանական հանձնաժողովների համատեղ նիստում հայտարարեց ՀՀ վարչապետ Նիկոլ Փաշինյանը։
Միաժամանակ, ինչպես նշել է վարչապետը, պաշտպանական ծախսերի աճի դինամիկան ոչ մի կերպ չի հակասում Հայաստանի կառավարության կողմից նախապես հայտարարված խաղաղության օրակարգին։
Նրա խոսքով, պաշտպանության ծախսերը հանրապետության համար զգալի են և առանցքային։ «Մեզ համար առաջնային նշանակություն ունի մեր բանակի և մեր զինված ուժերի բարեփոխումը»,- ընդգծել է կառավարության ղեկավարը։
Նա նշել է, որ մարտունակ զինված ուժերի առկայությունը ցանկացած պետության օրինական իրավունքն է և պարտադիր հատկանիշը։ «Եվ մենք այս ուղղությամբ առաջ ենք գնում։ Իհարկե, ոչ այն տեմպերով, ինչ կցանկանայինք, բայց դրա համար կան բավականին օբյեկտիվ և սուբյեկտիվ պատճառներ։ Այնուամենայնիվ, պետք է փաստեմ՝ Հայաստանի իշխանություններն արդեն իրականացնում են այն կուրսը, որը նախապես հայտարարել էին։ Մասնավորապես՝ դիվերսիֆիկացնել մեր հարաբերությունները անվտանգության ոլորտում»,- եզրափակել է վարչապետը։
