Զանգվածային անկարգություններին մասնակցելու մեղադրանքով կալանավորվել են արցախցի 30-ամյա Գոռ Հ.–ն և 21-ամյա Մխիթար Օհանջանյանը։ Այս մասին ՀՀ ՆԳՆ ոստիկանությունը հաղորդագրություն է տարածել, որտեղ նշել է, թե Մխիթարը հոկտեմբերի 24-ից հետախուզման մեջ էր և նրան հոկտեմբերի 27-ին Արշակունյաց պողոտայում են հայտնաբերել։
Նույն մեղադրանքով կալանավորված է նաև 30-ամյա Գոռ Հ.–ն, որը հոկտեմբերի 18-ից է հետախուզման մեջ եղել։ Նրան նույնպես հայտնաբերել են հոկտեմբերի 27-ին Բաբայան փողոցից։
Նշենք, որ խոսքը սեպտեմբերի 19-ին Արցախում ադրբեջանական ԶՈւ–ի կողմից սանձազերծված լայնածավալ ռազմական գործողությունների ֆոնին Երևանում տեղի ունեցած ցույցերի մասին է։
ՀՀ ԱԺ «Հայաստան» խմբակցության պատգամավոր Գեղամ Մանուկյանը «Ֆեյսբուքի» իր էջում գրել է, որ այցելել է «Արմավիր» ՔԿՀ, որտեղ պահվում է Մխիթարը։ Մանուկյանը նշել է, որ Մխիթարի հագին իր աշխատանքային հանդերձանքն է եղել, քանի որ իրավապահները նրան անմիջապես աշխատավայրից են տարել։
«Ոստիկանները մինչ այդ այցելել են Մխիթարի աշխատավայր, հետաքրքրվել նրանով, աշխատանքային ղեկավարն էլ երիտասարդին բնորոշել է իբրև բարեխիղճ աշխատող։ Մինչ առևանգումը Մխիթարին ոչ մի անգամ չեն կանչել հարցաքննության, ծանուցագիր չեն ուղարկել, թեև հեշտությամբ, ցանկության դեպքում, քննիչները կարող էին դա անել»,– գրել է Մանուկյանը։
Ընդդիմադիր պատգամավորը շեշտել է, որ Մխիթարը մինչև վերջերս ծառայել է Արցախում, ընտանիքը Հադրութի Տումի գյուղից է, բայց 2020 թվականին ստիպված են եղել լքել այն։
Նա գրել է, որ զանգվածային անկարգություններին մասնակցելու մեղադրանք է առաջադրվել ևս 2 անձի` Մանվել Պետրոսյանին ու Սամվել Միրզոյանին, որոնք նույնպես արմատներով Արցախից են։ Վերջինս, ի դեպ, անչափահաս է։ Դատարանն այժմ քննում է կալանքի միջնորդության հարցը։
