Հուսով եմ, որ հաջորդ հանդիպումները «3+3» ձեւաչափով տեղի կունենան Բաքվում եւ Երեւանում։ Այս մասին ասել է Իրանի արտաքին քաղաքական գերատեսչության ղեկավար Հոսեյն Ամիր-Աբդոլահիանը Թեհրանում արտգործնախարարների հանդիպման արդյունքնեի հիման վրա, տեղեկացրել է Mehr-ը։
«Հանդիպումը Թեհրանում կողմնորոշված էր դեպի խաղաղություն, համագործակցություն եւ առաջընթաց Հարավային Կովկասում, իսկ մեր բանակցությունները կենտրոնացած էին հանդիպման տեքստի եւ հայտարարության տեքստի վրա։ Հոսով եմ, որ այդ հանդիպումները կշարունակվեն Բաքվում եւ Երեւանում հաջորդ հանդիպումից հետո, որը տեղի է ունենալու Թուրքիայում»,- ասել է նա։
Իրանի արտգործնախարարի խոսքով՝ հանդիպմանը Ադրբեջանի եւ Հայաստանի արտգործնախարարների ներկայությունը վկայում է խաղաղության եւ բարեկամության տանող շարժման մասին այդ երկու երկրների միջեւ։ «Մենք հուսով ենք, որ որքան հնարավոր է շուտ կդառնանք Բաքվի եւ Երեւանի միջեւ խաղաղության համաձայնագրի վկաները»։
Նշենք, որ ԱԳՆ ղեկավարների հաջորդ հանդիպումը «3+3» ձեւաչափով տեղի է ունենալու Թուրքիայում 2024թ. առաջին կեսին։
