Հայաստանը երբեք չի հրաժարվել Լեռնային Ղարաբաղի հակամարտության կարգավորման առաջարկներից։ Այս մասին ՀՀ երրորդ նախագահ Սերժ Սարգսյանն ասաց լրագրողների հետ ճեպազրույցում։
Նախկին նախագահին խնդրեցին մեկնաբանել ՌԴ նախագահ Վլադիմիր Պուտինի վերջին հայտարարություններն այն մասին, թե Հայաստանի ղեկավարությունը նախորդ 10-15 տարում հրաժարվել է այն տարբերակից, որով Ադրբեջանին վերադարձվում է ԼՂ–ի 5 շրջանը, այն պայմանով, որ հետագայում ԼՂ կարգավիճակի վերաբերյալ հանրաքվեի ժամկետները կպահպանվեն։
Նրա խոսքով` ամբողջ աշխարհը գիտի, որ 2011 թվականին Կազանում հենց ադրբեջանական կողմն է հրաժարվել փաստաթուղթ ստորագրելուց։ Բացի դրանից, Սարգսյանը հավելեց, որ մինչև 2018 թվականի ապրիլ (այդ ժամանակ Սարգսյանը հրաժարական տվեց` խմբ.), Հայաստանը որևէ փաստաթուղթ չի քննարկել, բացի փոխզիջումների վերաբերյալ հանրահայտ ֆորմուլայից։
«Համանախագահների բոլոր առաջարկներին մենք ասել ենք` ստացեք Ադրբեջանի համաձայնությունը, հետո մենք կասենք մեր կարծիքը։ Բոլոր պարագաներում էլ ադրբեջանցիները դեմ են եղել։ Մենք չեն հրաժարվել որևէ առաջարկությունից, քանի որ այլ առաջարկներ չեն ստացվել, բացի փոխզիջումների հայտնի տարբերակից»,– ընդգծեց Սերժ Սարգսյանը։
Հիշեցնենք, որ հոկտեմբերի 5-ին «Վալդայ» բանավիճային ակումբի նիստում Պուտինը նշել էր, որ Ռուսաստանը վերջին 15 տարում հայ ընկերներին առաջարկել է փոխզիջման գնալ՝ Ադրբեջանին վերադարձնել Ղարաբաղի 5 շրջանը, երկուսը պահել և այդպիսով պահպանել տարածքային կապը Հայաստանի և Ղարաբաղի միջև: Բայց հայ գործընկերներն ասել են, որ այդ տարբերակը Հայաստանի համար սպառնալիքներ կստեղծի:
