Այս պահին Լեռնային Ղարաբաղի քաղաքացիական բնակչությանն ուղիղ սպառնալիք չկա։ Ֆեյսբուքյան ուղիղ եթերում այս հայտարարությունն արեց ՀՀ վարչապետ Նիկոլ Փաշինյանը։
«ԼՂ մեր հայրենակիցների անվտանգ տեղում գտնվելը և ապրելը մեր պարտականությունների մեջ է։ Գիտենք նաև, որ ՌԴ խաղաղապահ զորախմբի կենտրոնակայանում գտնվում է շուրջ 1200-1300 քաղաքացի, երեխա, որոնց նկատմամբ նրանք հոգ են տանում: Մենք էլ հնարավոր միջոցները պատրաստ ենք ձեռնարկել, սակայն Լաչինի միջանցքի փակ լինելու մեջ է խնդիրը։ Ինչպես գիտեք, մեր հումանիտար բեռները սպասում են Կոռնիձորում»,– ընդգծեց նա։
Փաշինյանի կարծիքով` ԼՂ հայերը պետք է ապրեն արժանապատիվ, անվտանգ պայմաններում և իրենց տներում։ Նա շեշտեց` Հայաստանը հայաթափման քաղաքականություն չի վարում, դա վարում է Ադրբեջանը և իրենք չեն ուզում, որպեսզի Ադրբեջանը Հայաստանի ձեռքերով ԼՂ-ն հայաթափի։
