Sputnik Արմենիա–ն գրում է. Ադրբեջանի զինված ուժերը 2022 թվականի սեպտեմբերյան ագրեսիայից հետո Ջերմուկի ուղղությամբ անմիջական հսկողության տակ են վերցրել ավելի քան 70 քառ. կմ տարածք, ինչի մասին վկայում են արբանյակային նկարները։
«Ընդհանուր առմամբ, պաշտոնական տվյալներով, Ադրբեջանը 2021-2022 թվականներին Հայաստանի տարածքից օկուպացրել է մոտ 150 քառ. կմ, մինչդեռ Հայաստանի պաշտպանության նախարարությունը տեղեկություն չի տրամադրում, թե կոնկրետ որ շրջանում որքան տարածք է գտնվում Ադրբեջանի վերահսկողության տակ»,– գրում է լրատվամիջոցը՝ հիշեցնելով, որ ՊՆ–ին ուղղված իր հարցմանը, թե արդյոք 2022 թվականի սեպտեմբերից հետո Ադրբեջանը որևէ առաջխաղացում ունեցե՞լ է Ջերմուկի ուղղությամբ, նոր դիրքեր տեղակայե՞լ է այդ հատվածում, և քանի՞ քառ. կմ տարածք է գտնվում Բաքվի վերահսկողության տակ, նախարարությունից պատասխանել են. «2022 թվականի սեպտեմբերից հետո ադրբեջանական կողմը Ջերմուկի ուղղությամբ որևէ առաջխաղացում չի ունեցել»:
Լրատվամիջոցը շարունակում է. «եթե համեմատենք Sentinel-2 արբանյակային նկարները, որոնք արվել են 2022 թվականի հոկտեմբերին և 2023 թվականի օգոստոսին, ապա ինժեներական աշխատանքները և Ադրբեջանի ԶՈւ դիրքերի ամրապնդումն այս տարածքում առավել քան ակնհայտ են»։
«Եթե առաջնորդվենք նախկին խորհրդային սահմաններով, ապա մոտավոր հաշվարկներով ադրբեջանական զինուժն այս տարածքում ուղղակիորեն վերահսկում է ավելի քան 70 քառ. կմ տարածք (խոսքը ֆիզիկապես տեղակայվելու մասին է)»,– գրել է կայքը։
Ըստ ՀՀ ԶՈւ գլխավոր շտաբի պետ Էդվարդ Ասրյանի 2023-ի ապրիլին արված հայտարարության՝ հակառակորդի ներթափանցած տարածքն ընդհանուր մակերեսային առումով կազմում է մոտ 60 քառակուսի կիլոմետր՝ շուրջ 11 կմ ճակատով և 8 կմ խորությամբ։
