ՌԴ նախագահ Վլադիմիր Պուտինը Դոնեցկի ղեկավարի պաշտոնակատար Դենիս Պուշիլինի հետ հանդիպմանը ցավակցություն է հայտնել Տվերի մարզում ավիավթարի հետևանքով զոհված բոլոր զոհերի ընտանիքներին։
Նա նշել է, որ եթե նախնական տվյալները ճիշտ են, ապա «Վագների»-ի անդամները մահացել են, վթարի առընչությամբ քննություն է ընթանում։
«Ես Պրիգոժինին վաղուց եմ ճանաչում։ 90-ականների սկզբից։ Նա բարդ ճակատագրի տեր մարդ էր։ Եվ նա սխալներ ունեցել է։ Եվ անհրաժեշտ արդյուքների էլ է հասել: Ե՛վ իր համար, և՛ երբ ես նրան դիմել եմ դրա համար։ Ընդհանուր գործի համար։ Նա տաղանդավոր մարդ էր։ Նա աշխատել է ոչ միայն մեր երկրում, այլև արտասահմանում՝ Աֆրիկայում։ Աշխատել է նավթի, գազի, թանկարժեք մետաղների ոլորտում»,- ասել է ՌԴ նախագահը։
Վլադիմիր Պուտինը հայտնել է, որ Պրիգոժինը հենց երեկ է վերադարձել Աֆրիկայից ու հանդիպել Ռուսաստանի որոշ պաշտոնյաների հետ։ «Ինձ զեկուցել է Ռուսաստանի Քննչական կոմիտեի ղեկավարը, որ նրանք հետաքննություն են սկսել այս միջադեպի առնչությամբ, և այն ամբողջությամբ կիրականացվի և կավարտվի»,- ասել է նախագահը։
«Տեսնենք՝ ինչ կասեն քննիչները»,- հավելել է նա։
Օգոստոսի 23-ին Տվերի մարզում կործանվել է «Վագների» ղեկավար Եվ գենի Պրիգոժինին տեղափոխող ինքնաթիռը։ Ռոսավիացիայի տվյալներով՝ կործանված ինքնաթիռում եղել են Պրիգոժինը, ռազմական կազմակերպության հրամանատար Դմիտրի Ուտկինը։ Ընդհանուր առմամբ, տասը մարդ է զոհվել, եթե ցուցակը ճիշտ է։
Որոշ տեղեկությունների համաձայն՝ «Վագների» մարտիկները Պրիգոժինի և Ուտկինի մարմիններն արդեն իսկ ճանաչել են։
