«Երեւանի Մխիթար Հերացու անվան պետական բժշկական համալսարան» հիմնադրամում կատարված առերեւույթ կոռուպցիոն չարաշահումներին առնչվող քրեական վարույթի շրջանականում Արմեն Աշոտյանին եւ մյուս մեղադրյալներին ու նրանց փոխկապակցված անձանց 51 անշարժ եւ 37 շարժական գույքերի մասին տվյալներն ուղարկվել են դատախազություն։ Այս մասին ը տեղեկացնում է Քննչական կոմիտեն։
Նշված քրեական վարույթով քրեական հետապնդում է հարուցվել 5 անձի նկատմամբ, այդ թվում՝ ՀՀ կրթության եւ գիտության նախկին նախարար, «Երեւանի Մխիթար Հերացու անվան պետական բժշկական համալսարան» հիմնադրամի հոգաբարձուների խորհրդի նախկին նախագահ Ա․Աշոտյանի, «Երեւանի Մխիթար Հերացու անվան պետական բժշկական համալսարան» հիմնադրամի ռեկտոր Մ․Նարիմանյանի։
«Ապօրինի ծագում ունեցող գույքի բռնագանձման մասին» ՀՀ օրենքի իրավակարգավորումների համաձայն՝ այն դեպքում, երբ հարուցված քրեական վարույթով անձը որպես մեղադրյալ է ներգրավվել նույն օրենքով նախատեսված հանցագործություններից որեւէ մեկի կատարման համար եւ կան բավարար հիմքեր՝ կասկածելու, որ առկա է ապօրինի ծագում ունեցող գույք, ապա քրեական վարույթով ձեռք բերված այդ տվյալները փոխանցվում են ՀՀ գլխավոր դատախազությանը։
Ելնելով վերոգրյալից եւ հաշվի առնելով, որ ՀՀ քննչական կոմիտեի ՀԿԳ քննության գլխավոր վարչությունում քննվող վերոնշյալ քրեական վարույթով ձեռք բերված տվյալները կասկած են հարուցում ապօրինի ծագման գույքի առկայության մասին՝ վարույթն իրականացնող մարմինը գրությամբ վարույթի նկատմամբ հսկողություն իրականացնող դատախազին է ուղարկել վերոնշյալ 5 մեղադրյալների եւ նրանց փոխկապակցված անձանց անվամբ հաշվառված, նախնական տվյալներով, ընդհանուր առկա 36 եւ օտարված 15 անշարժ գույքերի, 37 շարժական գույքերի մասին տվյալները՝ դրանցով Դատախազության գործառույթների շրջանակներում ապօրինի ծագում ունեցող գույքի բռնագանձման ուսումնասիրության վարույթ հարուցելու հիմքերի պարզման եւ ըստ այդմ իրավական գործընթաց նախաձեռնելու հարցը լուծելու նպատակով։
