Եթե Նիկոլ Փաշինյանը հայտարարում է, որ Արցախը ճանաչում է Ադրբեջանի կազմում, որ Արցախը ապագա ունի Ադրբեջանի կազմում, ԱՄՆ դեսպանը պետք է ավելի շատ հայ լինի, քան Նիկոլ Փաշինյա՞նը: Այս մասին, այսօր՝ հուլիսի 4-ին, ՀՀԿ-ականների բողոքի ակցիայի ժամանակ լրագրողների հետ զրույցում նշեց ԱԺ նախկին փոխխոսնակ, ՀՀԿ մամուլի խոսնակ Էդուարդ Շարմազանովը՝ անդրադառնալով ԱՄՆ դեսպան Քրիստինա Քվինի հայտարարությանը, թե հավատում Ադրբեջանի կազմում ԼՂ-ի գոյությանը:
«Ես չեմ արդարացնում ԵԱՀԿ Մինսկի խմբի համանախագահ երկրի, ՄԱԿ-ի ԱԽ անդամ երկրի դեսպանի խոսքը, բայց ինչի՞ց ենք զարմանում: Եթե Նիկոլ Փաշինյանը, որ իբր թե ՀՀ քաղաքացիների քվեով դարձել է վարչապետ, ճանաչում է Արցախն Ադրբեջանի կազմում, ԱՄՆ դեսպանին քննադատողները թող թռնեն Նիկոլի դեմքին: Նիկոլը Արցախը տվել է թուրքին, էդքան շուխուռ չենք անում, ինչքան երբ ԱՄՆ դեսպանն ասել է, որ Արցախը Ադրբեջանում հեռանկար ունի: Շատ սխալ է արել, որ ասել է, որովհետեւ ԱՄՆ դեսպանի հայտարարությունն արմատապես հակասում է ԱՄՆ-ի որդեգրած սկզբունքներին առնվազն 2008-2018 թվականներին Սերժ Սարգսյանի նախագահության շրջանում: Եթե տիկին դեսպանը չգիտի, տեղեկացնեմ, որ եթե 2009-2013 թվականների ընթացքում 5 անգամ ԱՄՆ նախագահները, իսկ այդ ժամանակ Օբաման էր նախագահ, Նախագահ մեդվեդեւի, նախագահ Պուտինի, նախագահ Սարկոզիի ու նախագահ Օլանդի հետ մեկտեղ գրավոր համաձայնություն է ընդունել, որի համաձայն ԼՂ ժողովրդի ինքնորոշման իրավունքի իրացումը ունի պարտադիր բնույթ, կինոն պրծնում է:
Ես պաշտոնապես հայտարարում եմ, որ Հայաստանը չի ճանաչում Արցախն Ադրբեջանի կազմում, այլ ճանաչում է Նիկոլ Փաշինյանն ու ՔՊ-ական խունտան»,-հայտարարեց Շարմազանովը:
Նա հավելեց, որ եթե հայ ժողովրդի եւ Նիկոլ Փաշինյանի տեսակետները Արցախի հարցում նույնական լինեն, նշանակում է մենք չունենք Հայաստան, ունենք Էրմենիստան:
