Հակոբյան Աննան այլևս Հայաստանում ռուսաց լեզվի պաշտպանն ու «ոսկեղենիկ ռուսերենի» պաշտոնական ներկայացուցիչն է. ֆեյսբուքյան իր էջում գրում է իրավապաշտպան Կարեն Հեքիմյանը․
Ուրեմն, ինչ-որ մեկը համացանցում տեսանյութ է տարածել, որտեղ երևանյան բարերից մեկում հաճախորդը ռուս մատուցողուհուց հայալեզու ճաշացանկ է պահանջել, իսկ վերջինս չի հասկացել հաճախորդի պահանջը: Տեսանյութի տարածողն էլ վրդովվել էր «Լեզվի մասին» օրենքի ոտնահարման կապակցությամբ:
Ի պատասխան, Հակոբյան Աննան «փորփրել էր» տեսանյութը տարածողի կենսագրությունը և պարզել, որ վերջինս շատ անգամ իր մտերիմների հետ շփվում է «ոսկեղենիկ ռուսերենով»:
Նախ՝ այս պատմությունից հասկացվում է, որ ՀՀ վարչապետի կինը լիակատար անգործության է մատնվել, հետևում է տարբեր անձանց և վերջիններիս վերաբերյալ հավաքագրում, մշակում և հրապարակում է անհատական տվյալներ:
Սակայն, խնդիրը դա չէ: Մեր երկրում գործում է «Լեզվի մասին» օրենքը, որը պարտադիր է կիրառման համար:
Ինչու՞ պետք է օրինական գործող սրճարանը չունենա հայալեզու ճաշացանկ:
Ինչու՞ պետք է օրինական գործող սրճարանի՝ օրինական աշխատողը չիմանա ՀՀ պետական լեզուն:
Ինչու՞ պետք է ՀՀ վարչապետի օրինական կինը, փոխարենը կանխի իրեն հայտնի դարձած իրավախախտումը, փաստացի պաշտպանի իրավախախտին:
Ինչու՞ պետք է ՀՀ քաղաքացին պաշտպանելով «Լեզվի մասին» ՀՀ օրենքը, միաժամանակ չխոսի «ոսկեղենիկ» ռուսերենով, անգլերենով, ֆրանսերենով, վրացերենով կամ թուրքերենով:
Եվ, եթե Հայաստանում դեռ գործում է Լեզվի կոմիտե / Language Committee -ն, ապա այն ՊԱՐՏԱՎՈՐ Է Հակոբյան Աննայի հաղորդման հիմքով վարույթ հարուցել իրավախախտ սրճարանի տնօրենի նկատմամբ, իսկ Հակոբյան Աննային, որպես վկա, ներգրավվել վարույթի լսումներին:
ՀԳ. Ի գիտություն Հակոբյան Աննայի, 17 տարեկանից սկսած ակտիվ պայքարում եմ Հայաստանում Հայոց լեզվի գերակայության համար, սակայն դա ինձ չի խանգարում խոսել «ոսկեղենիկ» ռուսերենով:
