ԱՄՆ պետքարտուղարության խոսնակ Մեթյու Միլլերն անդրադարձել է նախօրեին Հակարիի կամրջի մոտ տեղի ունեցած միջադեպին։Պաշտոնյան նշել է, որ ԱՄՆ-ն մտահոգված է ստեղծված իրավիճակով։
«Մենք շարունակում ենք մտահոգված լինել ստեղծված իրավիճակով: Եվ մենք շարունակում ենք կոչ անել երկու կողմերին աշխատել միասին՝ առկա տարաձայնությունները հաղթահարելու համար»,– ասել է Միլլերը։
Նրա խոսքով, Վաշինգտոնում հավատում են, որ խաղաղության պայմանագիրը դեռ հասանելի է։ «Մենք անհամբեր սպասում ենք երկու կողմերին հրավիրելուն՝ առաջ շարժվելու համար»,-հավելել է նա։
Հիշեցնենք, որ հունիսի 15-ին Ադրբեջանի սահմանապահ ծառայության մի խումբ զինծառայողներ Հակարիի կամրջի ուղղությամբ առաջխաղացման փորձ են կատարել՝ ՀՀ տարածքում դրոշ տեղադրելու նպատակով, ինչը կանխվել է հայ զինծառայողների կողմից։ Միջադեպի արդյունքում հայ սահմանապահ է վիրավորվել։
Հավելենք նաև, որ Հակարիի կամրջի մոտ տեղի ունեցած ադրբեջանական սադրանքից հետո Քաշաթաղի (Լաչինի) միջանցքով բոլոր հումանիտար ուղևորափոխադրումներն ու բեռնափոխադրումները արգելվել են Ադրբեջանի կողմից:
