ՀՀ Սյունիքի մարզի Կապան քաղաքում ՌԴ հյուպատոսություն բացելու վերաբերյալ ժամկետները դեռ հստակեցված չեն, բայց ռուսական կողմը փորձում է արագացնել գործընթացը։ Այս մասին Sputnik Արմենիայի հետ զրույցում ասաց ՀՀ–ում ՌԴ դեսպանության խորհրդական–դեսպանորդ Մաքսիմ Սելեզնյովը։
«Ժամկետներ դեռ չկան, բայց մենք փորձում ենք այն հնարավորինս շուտ բացել։ Մոսկվայի մեր գործընկերների հետ Կապանի քաղաքապետարանի հետ այսօր արդեն ուսումնասիրել ենք այն տարածքները, որոնք կարող են մեզ համապատասխանել։ Ուզում եմ ասել, որ մի քանի որոշում կա արդեն, որոնցով մենք կշարունակենք հետագայում աշխատել»,– ասաց դիվանագետը։
Նրա խոսքով, գլխավոր հյուպատոսությունը 2 հիմնական գործառույթ ունի՝ հենց հյուպատոսական ծառայություններ և քաղաքական գործառույթ։
«Մենք ավելի մոտ կլինենք մարդկանց, քաղաքային իշխանությանը, մարզին։ Չեմ թաքցնի՝ այստեղ ռուսական ներկայությունը մեծ է` տնտեսական, ռազմական, սահմանային։ Գլխավոր հյուպատոսության բացումը հերթական քայլն է մեր դիրքերն ամրապնդելու ուղղությամբ»,– նշեց Սելեզնյովը։
Հաշվի առնելով այն, որ Կապանում ավելի վաղ Իրանը նույնպես գլխավոր հյուպատոսություն է բացել, դիվանագետը հայտարարեց, որ ռուսական կողմը ուրախ կլինի համագործակցել նաև իրանցի գործընկրների հետ։
Հիշեցնենք, որ Սյունիքում ՌԴ հյուպատոսության մասին բացելու մասին առաջին անգամ խոսել է Ռուսաստանի ԱԳՆ ԱՊՀ երկրների 4-րդ դեպարտամենտի տնօրենի տեղակալ Սերգեյ Պալտովը։ Նրա խոսքով` մայիսի 25-ին Մոսկվայում կայացած Փաշինյան–Պուտին երկկողմ հանդիպումից հետո հայկական կողմը դրական էր գնահատել այդ մտահղացումը։
