Հայաստանը ճանաչում է 86.600 քկմ տարածք ունեցող Ադրբեջանի ամբողջականությունը, Ադրբեջանը, իր հերթին, հայտարարել է, որ ճանաչում է 29,800 քկմ տարածքով ՀՀ ամբողջականությունը։ Այս մասին, այսօր՝ մայիսի 17-ին, Ռեյկյավիկում ընթացող ԵԽ գագաթնաժողովում ելույթի ժամանակ հայտարարել է Նիկոլ Փաշինյանը։
«Երկար տարիներ ԼՂ հակամարտության առկայությունը արդարացում էր Հայաստանում ժողովրդավարության բացակայության համար: 2018-ին մեր թավշյա հեղափոխությունը պայմաններ ապահովեց ժողովրդավարական զարգացումների համար, բայց 2020-ի սեպտեմբերին Ադրբեջանը հարձակվեց ԼՂ-ի վրա եւ Հայաստանը ստիպված էր ներգրավվել պատերազմի մեջ:
2020-ի նոյեմբերի 9-ին ես ստորագրեցի եռակողմ հայտարարությունը, որը պատճառ դարձավ Հայաստանում պետական ինստիտուտների վրա հարձակումների համար, բայց մենք ունակ եղանք պահպանել ժողովրդավարական կարգը»,-նշեց Փաշինյանը:
Նա հավելեց, որ 2021-ի ԱԺ արտահերթ ընտրություններից առաջ, մայիսի 12-ին Ադրբեջանը ներխուժեց Հայաստանի տարածք: Փաշինյանը նկատեց, որ 2021 թվականի արտահերթ ընտրություններում իրենք առաջ մղեցից խաղաղության օրակարգը եւ հաջողության հասան, բայց այդ խաղաղության օրակարգը եւս հարձակման ենթարկվեց, Ադրբեջանը 2021-ի նոյեմբերին եւ 2022-ի սեպտեմբերին կրկին ներխուժեղ Հայաստանի տարածք:
Փաշինյանի խոսքով, 2022-ի հոկետեմբերի 6-ին Պրահայում Հայաստանի եւ Ադրբեջանի ղեկավարների միջեւ հմաձայնություն է կայացել, ըստ որի կողմերը կարգավորում են իրենց հարաբերությունները հիմք ընդունելով 1991-ի Ալմա Աթայի հռչակագիրը, որով Խորհրդային Հայաստանի եւ Խորհրդային Ադրբեջանի վարչական սահմանները դառնում են պետական սահմաններ:
Նա հավելեց, որ երեք օր առաջ Բրյուսելում ավելի են առաջ գնացել եւ նշվել է, որ Հայաստանը ճանաչում է 86.600 քկմ տարածք ունեցող Ադրբեջանի ամբողջականությունը, Ադրբեջանը, իր հերթին ճանաչում է 29,800 քկմ տարածքով ՀՀ ամբողջականությունը:
ՀՀ վարչապետը հիշեցրեց, որ Լաչինի միջանցքի ապօրինի շրջափակման հետեւանքով ԼՂ-ի հայերը 5 ամիս կտրված են աշխարհից եւ այնտեղ հումանիտար ճգնաժամ է հասունացել, եւ ԼՂ եւ Լաչինի միջանցք միջազգային առաքելություն ուղարկելը խիստ անհրաժեշտություն է:
Նա ընդգծեց, որ անհրաժեշտ է Բաքվի եւ Ստեփանակերտի միջեւ միջազգային մեխանիզմների ներքո բանակցություններ սկսվեն նպատակ ունենալով ապահովել ԼՂ հայերի անվտանգությունը եւ մարդու իրավունքները:
Ըստ ՀՀ վարչապետի, Եվրոպայի խորհուրդը, օգնելով հասցեագրել այս հարցերը, կնպաստի Հարավային Կովկասում կայունությանն ու ժողովրդավարությանը։
