Ավետ Բարսեղյանը չի հավատում, որ այս իշխանության օրոք հայանպաստ լուծում կլինի Արցախի հարցում։
Հայաստանի մշակույթի վաստակավոր գործիչը միացել է ԱԺ մարդու իրավունքների և հանրային հարցերի մշտական հանձնաժողովի նախագահ Թագուհի Թովմասյանի կողմից կազմակերպված «Ո՛չ Արցախի զտմանը» խորագրով ստորագրահավաքին։
«Այս իրավիճակի ավարտը կլինի այն ժամանակ, երբ հասնի բոլորի գիտակցությանը, սրտին և հոգուն: Սա առաջին հերթին ինձ է վերաբերում: Ես երբեք դիմացինիս չեմ քննադատում: Ես սեփական անձս բերում եմ «Մոսկվա» կինոթատրոն՝ ստորագրելու: Երբ յուրաքանչյուրի սրտին այդ ստորագրությունը կհասնի՝ օրհասական, շատ կարևոր ու շատ հրատապ, այդ ժամանակ էլ, երևի թե, ինչ-որ մեծ քայլ կլինի դեպի լուծում», — լրագրողների հետ զրույցում ասել է Ավետ Բարսեղյանը:
Նա կարծում է, որ սեփական երեք շերտանոց՝ մտքի, հոգու, սրտի հասանելիության պարագայում մենք կկարողանք գոնե ինչ-որ կերպ դուրս գալ այս վիճակից։
Հարցին՝ գործող իշխանությունների պարագայում Արցախի հարցում հնարավո՞ր է ակնկալել ճիշտ հանգուցալուծում, Ավետ Բարսեղյանը պատասխանել է՝ հարցի մեջ արդեն պատասխանը կա:
«Չէ՛, չի լինի: Գործող իշխանությունը երևի իր միջով այդ երեք շերտերով չի անցկացնում այդ ամեն ինչը … Գնալով մի քիչ դժվարանում ելք ու լույսը տեսնել, բայց թևաթափ չեմ լինում, միևնույնն է՝ հույս՝ մի քիչ ավելի կաղ, ավելի հաշմանդամ, բայց դեռ կա…»,- ասել է Ավետ Բարսեղյանը:
