Սահմանապահ զորքերը սահմանագծման հարցի շուրջ բանակցություններ վարելու լիազորություն չունեն։ Նիկոլ Փաշինյանն ԱԺ ամբիոնից հանցագործության մասին հաղորդում է ներկայացրել։ Քաղաքագետ Խաչիկ Գալստյանի գնահատմամբ՝ Նիկոլ Փաշինյանի՝ ԱԺ -ում հնչեցրած հայտարարությունը հանցագործության մասին հաղորդում է։
Հիշեցնենք՝ ԱԺ-ում պատասխանելով լրագրողների հարցերին ՀՀ վարչապետը հայտարարել էր, որ Տեղ գյուղում մոտ 5 կմ հատվածը համարվել է խնդրահարույց, որը կրճատվել է ևս 1,4 կմ-ով։ «Այդքան սահման ճշգրտվել է, ինչը նշանակում է, որ և՛ մենք, և՛ ադրբեջանցիներն այդ կետի վերաբերյալ ունենք ընդհանուր կարծիք»,- ասել էր Փաշինյանը՝ հույս հայտնելով, որ մնացած 3,6 կմ հատվածը եւս կճշգրտվի։ Նկատենք, որ Ն.Փաշինյանը նույն հարցազրույցում հաստատել էր, որ «պրոբլեմատիկ» հատվածը գտնվել է ՀՀ ինքնիշխան հատվածում, եւ սահմանապահները բանակցելով համաձայնության են գալիս նոր սահմանի շուրջ։
«Փորձը ցույց է տալիս, որ երբ սահմանապահներն են իրեր հետ աշխատում, ապա որոշակի արդյունքների կարող է բերել»,- ասել էր վարչապետը։ Այս հայտարարությունից հետեւում է, որ սահմանապահները փաստացի իրականացնում են սահմանազատում ու սահմանագծում՝ օրենքով չունենալով նման լիազորություն։
Քաղաքագետ Խաչիկ Գալստյանը «Փաստինֆո»-ի հետ զրույցում նկատել է՝ վերջին իրադարձությունները ցույց են տալիս, որ հատկապես Սյունիքի շրջանում ադրբեջանական զորքը, առանց որևէ դիմադրության, առաջ է գալիս՝ զբաղեցնելով որոշակի դիրքեր:
«Պարզվել է, որ այդ հատվածներում սահմանապահ զորքերը բանակցում են ադրբեջանական զինված ուժերի ներկայացուցիչների հետ՝ սահմանների տեղակայման և սահմանագծման հարցի շուրջ: Սա ենթադրում է որոշ գաղտնի պայմանավորվածություններ, որը նույնպես ժողովրդին հայտնի չէ»,- ասել է գործիչը՝ նկատելով, որ որևէ երկրի սահմանների դեմարկացիան և դելիմիտացիան իրականացվում է համապատասխան հանձնաժողովի մանդատի շրջանակներում:
«Սահմանապահ զորքերի գործունեության իրավական հիմքը ՀՀ Սահմանադրությունն է ,ըստ որի Հայաստանի տարածքային յուրաքանչյուր փոփոխություն հնարավոր է միայն հանրաքվեի ճանապարհով:Սա, ՀՀ իշխանության անգործության, թափթփված և ադրբեջանանպաստ քաղաքականության հերթական դրսևորումներից է»,- ընդգծել է Գալստյանը։
