Նախաքննական մարմինը մերժել է Արամ Նիկոլյանի դեմ քրեական գործ հարուցել հանցակազմի բացակայության պատճառով, Armenia Today-ին ասաց Նիկոլյանի փաստաբան Ալեքսանդր Կոչուբաևը։ «Քրեական գործ հարուցելու մերժման մասին որոշումն ուղարկվել է դատախազություն՝ օրինականությունն ստուգելու համար»,- մանրամասնեց նա։ Կոչուբաևի խոսքով՝ այժմ ինքը և իր հաճախորդն սպասում են դատախազության որոշմանն այս հարցով։
Դատախազությունն ու Քննչական կոմիտեն դեռ չեն մեկնաբանել այս տեղեկությունը։ Փաստաբանը վստահություն հայտնեց, որ քրեական գործ չի հարուցվի։ «Որովհետև, ըստ էության, նախաքննական մարմինը, ոստիկանությունը, դատախազությունը, քննչական մարմինը սարսափած են դրոշի այրման շուրջ տեղի ունեցած հասարակական արձագանքից։ Հենց այս հասարակական կարծիքի ճնշման տակ է, որ նախաքննական մարմինը, փաստորեն, քրեական գործ չհարուցեց»,- եզրափակեց փաստաբանը։
Հարցին, թե դրոշն այրելուց հետո Ադրբեջանի կողմից Երևանում կայանալիք Եվրոպայի առաջնությանը մասնակցելուց հրաժարվելու պատճառով դժվարություններ կառաջանա՞ն, փաստաբանը վստահություն հայտնեց, որ չեն առաջանա։ Արամ Նիկոլյանն ապրիլի 14-ին Երևանում Եվրոպայի առաջնության բացման արարողության ժամանակ այրել էր Ադրբեջանի դրոշը՝ խլելով այն դրոշակակրի ձեռքից։
Դրանից հետո Նիկոլյանը բերման էր ենթարկվել Երևանի Մալաթիայի ոստիկանության բաժին։ Ավելի ուշ նրա փաստաբան Ալեքսանդր Կոչուբաևը հայտարարել էր դիզայների ազատ արձակման մասին։ Այսօր նաև հայտնի դարձավ, որ ադրբեջանցի մարզիկները չեն մասնակցի Եվրոպայի առաջնությանը և վերադառնում են Բաքու՝ հոգեբանական ճնշման պատճառով։
Ծանրամարտի Եվրոպայի առաջնությունը տեղի կունենա ապրիլի 15-23-ը՝ Կարեն Դեմիրճյանի անվան մարզահամերգային համալիրում։ Վարչապետի աշխատակազմի ղեկավար Արայիկ Հարությունյանն ավելի վաղ Armenia Today-ին հայտնել էր, որ մրցաշարին մասնակցելու համար Հայաստան է ժամանել ադրբեջանական պատվիրակությունը՝ բաղկացած 12 հոգուց, որոնցից 4-ը մարզիկներ են։
Նյութի աղբյուր՝ Armenia Today
