Հայաստանի սահմանը 3 օր առաջ հատած ադրբեջանցին այսօր առավոտյան հայտնաբերվել է Սյունիքի մարզի Աճանան գյուղի տարածքում՝ թռչնաֆաբրիկայի հարևանությամբ։
Նրա մոտ հայտնաբերվել է հեռախոս, բայց զենք, հայտնաբերելու պահին, ադրբեջանցու մոտ չի եղել։ Ըստ ամենայնի՝ փորձել հատել սահմանը, դրա համար զենքը թաքցրել էր մոտակա որևէ տեղ։ Այդ մասին «Փաստինֆո»-ին հայտնեց Սյունիքի փոխմարզպետ Նարե Ղազարյանը։
«Հայտնաբերելու պահին զինված չի եղել, բայց, միանշանակ, նրա մոտ զենք եղել է։ Հավանաբար, ցանկացել է անցնել սահմանը, դրա համար զենքը թաքցրել է, էն էլ չի հասցրել անցնել։ Կապանի անտառապատ տարածքներում որոնողական աշխատանքները երեկվանից են ընթանում, երբ հայտնի դարձավ, որ սահմանը հատած ադրբեջանցին Սիսիայից անցել է Կապանի կողմ»,-ասաց փոխմարզպետը։
Վարկածը, որ ադրբեջանցու մոտ հայտնաբերված հեռախոսը կարող է պատկանել Զանգեզուրի պղնձամոլիբդենային կոմբինատի՝ երեկ սպանված պահնորդին, Ղազարյանը չմեկնաբանեց։
«Քննչական կոմիտեն հիմա զբաղվում է այդ հարցով. փորձում են պարզել, թե ինչ հեռախոս է ու ինչ հանգամանքներում է հայտնվել իր մոտ։ Շուտով պարզ կլինի՝ ադրբեջանցին առնչություն ունի՞ այդ սպանության հետ, թե՞ ոչ»,-ասաց Ղազարյանը։
Փոխմարզպետը նաև նշեց, որ չնայած հայտնաբերվել է նաև երկրորդ ադրբեջանցին, այդուհանդերձ, Սյունիքի բնակիչների մոտ զգոնությունն ավելացել է։ Ուժային կառույցները ևս, Ղազարյանի խոսքով, գյուղերում ուժեղացրել են հսկողությունը։
