ԲՀԿ նախագահ Գագիկ Ծառուկյնաը ուղերձ է հղել մայրության տոնի առթիվ
Սիրելի՜ կանայք, մայրեր, քույրեր, աղջիկներ
Մեծագույն ջերմությամբ ուզում եմ շնորհավորել ձեր տոնը՝ ուղղելով ձեզ ամենաանկեղծ մաղթանքներս։
Ապրիլի 7-ը հասարակ տոն չէ. սա ավետման օրն է՝ օր, երբ Մարիամ Աստվածածինը ստացավ ամենակարևոր լուրը։
Մեր հայրենիքի, մեր երկրի հերոսածին մայրերի համար վերջին տարիները ծանր լուրերով լի են եղել, և նոր մայրության մասին ավետումը ամենամեծ սփոփանքն ու մխիթարությունն է շատերի համար։ Մեր վերքերը պիտի բուժենք լավ լուրեր իրար ավետելով, և կուզեի, որ այդ լուրերը շատ լինեն։
Այս տոնական օրով ուզում եմ մաղթել, որ մայրանալու մասին ավետիսները բազմաթիվ լինեն մեր հայկական ընտանիքներում։
Արցախում ևս, շրջափակման ընթացքում, ծանր պայմաններում, բազմաթիվ ավետման լուրեր են հասնում ընտանիքներին, և ծնվող երեխաները հույսով են լցնում ծանր ժամանակներ ապրող սրտերը։ Յուրաքանչյուրիս պարտքն է առավելագույնս աջակցել այդ ընտանիքներին, որպեսզի մայրությունը միայն բերկրանք և ուրախություն բերի։
Արցախի, Հայաստանի բոլոր կանանց, աղջիկներին, նորից ուզում եմ շնորհավորել այս լուսավոր տոնի առթիվ և խնդրել. ձեր լույսը, ձեր ուժը, ձեր մեծ և բարի սրտերն ուղղեք մեր երկրի շենացմանը, մեր հայրենիքի վերականգնմանը։ Մայր եղե՜ք, քույր եղե՜ք մեր վիրավոր երկրին, սիրե՜ք և պաշտպան եղե՜ք մեր հայրենիքին ձեր կանացի մեծ ուժով։
Անսահման երջանկություն Ձեզ…
