Այս պահին Երևանի կենտրոնում՝ Կասկադի հատվածում լարված իրավիճակ է: Քաղաքացիները մտահոգված են, որ Երևանում ծառեր են հատվում: Aravot.am-ի հետ զրույցում նրանք մտահոգություն հայտնեցին, որ որպես քաղաքացիներ իրենք տեղյակ չէին այդ մասին:
Նշեցին, որ ճիշտ կլիներ՝ նոր ծառերը տնկեին, տեսնեին՝ ինչպես են աճում, հետո համատարած կերպով կտրեին ծառերը:
Կասկադի տարածքում հավաքված քաղաքացիներն իրենց բողոքն էին ներկայացնում Երևանի քաղաքապետարանի ներկայացուցիչներին:
Կասկադի տարածքում Aravot.am-ի հետ զրույցում «Ապրելու երկիր» կուսակցության համահիմնադիր Մեսրոպ Առաքելյանը վստահեցրեց՝ ցուցաբերվում է ոչ պրոֆեսիոնալ մոտեցում և մանրամասնեց. «Վերջին օրերին Երևանի քաղաքապետարանի որոշմամբ՝ հիմնականում Կենտրոնում մի շարք ծառերի վրա թղթեր են փակցված, որ այս ծառերը հատման ենթակա են: Այսինքն՝ ամբողջովին հատում են ծառերը՝ ներկայացնելով, որ նոր այլ տիպի ծառեր պիտի տնկեն: Բնական է՝ հանրային դժգոհություն է առաջացել, քանի որ ինչքան էլ քաղաքապետարանի կողմից հիմնավոր լինի, կա հստակ անհրաժեշտություն ավելի մասնագիտական և հանրային քննարկում իրականացնել, որ նաև հանրային մտահոգություն չլինի: Իհարկե, կարելի է ասել, որ որոշ ծառեր կան, որ պարբերաբար էտվել են, բայց ամբողջովին ծառերը հատել և նոր՝ փոքր շիվեր դնել, որոնց ապագան բավականին մտահոգիչ է, անընդունելի է: Մենք ականատես ենք լինում, որ բազմաթիվ վայրերում՝ Սարալանջում, որ ինչ-որ ծառատունկ է արվել, արդյունք չկա՝ քանի տարի է»:
Ըստ Մեսրոպ Առաքելյանի՝ ակնհայտ է, որ որևէ վստահություն չի ներշնչում, որ քաղաքապետարանը այս փոփոխությունների արդյունքում բնապահպանական բարեփոխումներ է անում. «Սկսել հենց այն հատվածից, որը Երևանի գլխավոր դեմքի ցուցադրության հատվածներից մեկն է, անընդունելի է: Հիմա պատրաստվում են տնկել նոր ծառեր: Ինքս մասնագետ չեմ, բայց բազմաթիվ մասնագետներ էլ են նաև մտահոգություն հայտնում, որ Երևանում նման ծառեր չեն տնկվել երբևէ, և շատ սխալ է տասնամյակներով աճած ծառերը կտրելը: Այսինքն՝ նոր փորձարկումներ են: Փորձարկում կարելի էր անել այլ հատվածներում, մի քանի տարի սպասել, նաև հանրության կարծիքը լսել: Այսօր չեն կարողանում հանրությանը ներկայացնել, թե դրանք ինչ ծառեր են: Այն ժամանակ, երբ այլ հատվածներում կունենային նման ծառեր և ցույց կտային, որ տեսեք՝ այս հատվածում այսպես ենք արել, ավելի արդյունավետ կլիներ: Ակնհայտ է, որ սա բնության նկատմամբ վանդալիզմ է: Միանշանակ անընդունելի է»:
Հետաքրքրվեցինք՝ Դուք և՞ս հանրային դժգոհություններ եք ստանում, մեր զրուցակիցը պատասխանեց. «Այո, նաև այսօր սոցիալական ցանցերում ենք ականատես լինում, որ մասնագետներն ու քաղաքացիները մտահոգություն են հայտնում: Հերթական անգամ այն հանգամանքին ենք ականատես լինում, որ հանրության համար կարևորագույն նշանակություն ունեցող խնդիրները պետք է հանրային մեծ քննարկման դրվեն, ինչը չի արվել: Այո, կարող է մասնագիտական տեսանկյունից որոշակի ճշմարտություն լինի, բայց պետք է անպայման հանրությունը տեղյակ լինի: Ի վերջո, քաղաքը հանրային սեփականություն է, ոչ թե քաղաքապետարանի մի քանի պաշտոնյաների որոշման արդյունքում պետք է փոփոխություն կատարվի: Այս քաղաքում տասնամյակներ մարդիկ են ապրել, իսկ պաշտոնյաներն անցողիկ են, և, հետևաբար, հանրային նման հնչեղություն ունեցող միջոցառումները ակնհայտ պետք է հանրային մեծ վստահություն ունենան»: Հարցին՝ սա թափթփվածությա՞ն արդյունք է, թե՝ դիտավորություն, Մեսրոպ Առաքելյանը պատասխանեց. «Կարծում եմ՝ սա ավելի շատ ոչ պրոֆեսիոնալ մոտեցման արդյունք է: Չունենալով նաև կոմպետենտ աշխատակազմ, չքննարկելով լայն հանրության, մասնագետների հետ, արագ ինչ-որ որոշումներ են կայացնում, որոնք ակնհայտ հանրային մեծ դժգոհություն են առաջացնում: Եվ հիմա բերելու են, դնեն բավականին ցածր ծառեր, շիվեր, և դեռ պարզ չէ՝ Երևանի բնության պայմաններում դրանք ե՞րբ կաճեն: Իսկ մենք օր օրի տեսնում ենք՝ ինչ բնապահպանական խնդիրներ ունենք: Օդի աղտոտվածությամբ բավականին լուրջ խնդիրներ ունենք մանավանդ Կենտրոն համայնքում, և այդ ծառերը հատել և դրա տեղը բերել ծառեր, որոնք նաև բնապահպանական խնդրի համար պետք է լուրջ երաշխիք լինեին, ունենալու ենք ավելի վատ պատկեր նաև բնապահպանական մասով»:
