Բուխարեստում ընթացող մինչև 23 տարեկան ազատ ոճային ըմբիշների Եվրոպայի առաջնությունում 70 կգ քաշային կարգում Հայկ Պապիկյանը, տոնելով երեք անընդմեջ հաղթանակ, դուրս է եկել եզրափակիչ, որտեղ ոսկե մեդալի համար պայքարելու է Ադրբեջանը ներկայացնող ըմբիշի հետ։
Հայկ Պապիկյանն իր առաջին գոտեմարտը Եվրոպայի առաջնությունում անցկացրեց լեհ Մաթեուշ Լուչինզսկիի հետ։ Հայ ըմբիշը բացահայտ առավելության հասավ 10։0 հաշվով։ Քառորդ եզրափակիչում մեր ըմբիշը 5։0 հաշվով պարտության մատնեց Ֆրանսիան ներկայացնող Մուհամադ Սանգարիրին, իսկ կիսաեզրափակիչում էլ ոչ մի շանս չտվեց Գերմանիան ներկայացնող Շամիլ Ուստաևին՝ 9։0։
Եզրափակիչում Հայկ Պապիկյանի մրցակիցը լինելու է Ադրբեջանը ներկայացնող դաղստանցի ըմբիշ Մագոմեդ Բաշիր Խանիևը։
Հայաստանը ներկայացնող մյուս 4 ըմբիշները պարտվեցին։ 57 կգ Էդիկ Հարությունյանը 2։3 հաշվով զիջեց թուրք Տոլգա Օզբեկին, բայց, քանի որ թուրք ըմբիշը հասել է եզրափակիչ, Հարությունյանը իրավունք է ստացել պայքարելու բրոնզե մեդալի համար։
65կգ քաշային Տիգրան Ղազարյանը քառորդ եզրափակիչում 5։8 հաշվով զիջել է թուրք Համզա Զոփալին, 79 կգ քաշային Նարեկ Գրիգորյանը քառորդ եզրափակիչում պարտվել է հույն Գեորգիոս Կուգիումցիդիսին, իսկ 97 կգ քաշային Խաչատուր Խաչատրյանը մեկնարկային գոտեմարտում պարտվել է մոլդովացի Ռադու Լեֆտերին։
